యమద్వితీయ భగినీ హస్త భోజనం: పాటించాల్సిన నియమాలు, సోదరి లేని వారు ఏం చేయాలి?

యమద్వితీయ రోజును భగినీ హస్త భోజనం పేరిట జరుపుకుంటారు. ఈ రోజు అన్నదమ్ములు తమ అక్కాచెల్లెళ్ల ఇళ్లకు వెళ్తారు. అక్కాచెల్లెళ్లు భోజనం వడ్డిస్తారు. ఇది సోదరీ సోదరుల బంధాన్ని పటిష్టం చేసే ఆచారంగా మారింది.

ఈ పండుగ వెనుక ఋగ్వేదంలోని యమ-యమి సంవాదాన్ని ఆధారంగా చెప్పుకుంటారు. వేదార్థం ఇది కాదని, ఆ పదాల ఆధారంగానే ఒక లౌకిక కథ ప్రచారంలోకి వచ్చిందని చెబుతారు. ఉత్తర భారతదేశంలో ఈ పండుగను భాయిదూజ్ పేరిట విరివిగా జరుపుకుంటారు. తెలుగువారు మంచిని తమ సంప్రదాయంగా చేసుకుంటారు. శ్రావణ పౌర్ణమినాడు రాఖీ పండుగ, ఆ తర్వాత యమద్వితీయ వస్తుంది. రెండూ సోదర బంధానికి చిహ్నాలే.

పాటించాల్సిన నియమాలు ఇలా ఉన్నాయి. సోదరుడు అక్కాచెల్లెళ్ల ఇంటికి వెళ్లాలి. సొంత సోదరీమణులు లేకపోతే పెద్దనాన్న, చిన్నాన్న పిల్లలను సోదరిగా భావించవచ్చు. స్నేహితులను కూడా సోదరిగా భావించి వారి ఇంటికి వెళ్లవచ్చు. బహుమతులు తీసుకెళ్లాలి. సోదరి ఆహ్వానించి కూర్చోబెట్టి భోజనం వడ్డించాలి.

భోజనం చేసి చేతులు కడుక్కున్న తర్వాత సోదరుడు బహుమతులు ఇవ్వాలి. కలకాలం ఆనందంగా ఉండాలని దీవించాలి. అక్క అయితే అక్క తమ్ముడిని దీవిస్తుంది. చెల్లెలు అయితే అన్న ఆమెను దీవిస్తాడు. ఇద్దరు, ముగ్గురు అన్నదమ్ములు ఉంటే కలిసే సోదరి ఇంటికి వెళ్లాలి.

ఒకరికంటే ఎక్కువ మంది సోదరీమణులు ఉంటే అందరూ పెద్ద అక్క ఇంట్లో లేదా చిన్న చెల్లెలి ఇంట్లో కలుసుకోవచ్చు. ఉద్యోగాలు, వ్యాపారాల వల్ల వెళ్లలేకపోతే ఫోన్ ద్వారా మాట్లాడుకోవచ్చు. లేదా సాయంత్రం వేళ ఒకచోట కలుసుకోవచ్చు.

ఆస్తి, డబ్బు, స్థలం గురించి అన్నదమ్ములు, అక్కాచెల్లెళ్ల మధ్య గొడవలు జరుగుతుంటాయి. అవి శాశ్వతం కావని ఈ పండుగ గుర్తు చేస్తుంది. బంధాలు, ప్రేమ, అభిమానం ముఖ్యమని చెబుతుంది.