ప్రకాశం జిల్లాలో ప్రైవేట్ బస్సు టైరు పేలి మంటలు.. 33 మంది ప్రయాణికులూ సురక్షితం

ప్రకాశం జిల్లా వలేటివారిపాలెం మండలం చుండి సమీపంలో అర్ధరాత్రి ప్రైవేట్ ట్రావెల్స్ బస్సులో మంటలు చెలరేగాయి. బస్సులో ఉన్న 33 మంది ప్రయాణికులు సురక్షితంగా బయటపడ్డారు. ఎవరికీ గాయాలు కాలేదు.

కడప నుంచి విజయవాడకు వెళ్తున్న ఆ బస్సు గంటకు సుమారు 90 నుంచి 120 కిలోమీటర్ల వేగంతో వెళ్తోంది. ఆ సమయంలో టైరు పేలడంతో బస్సు పక్కకు ఒరిగింది. వెంటనే మంటలు చెలరేగి బస్సు మొత్తం అంటుకుంది.

ప్రయాణికులంతా నిద్రలో ఉన్న సమయంలో ఈ ఘటన జరిగింది. డ్రైవర్ వెంటనే బస్సును ఆపి, ప్రయాణికులను బయటకు దించారు. ఆ తర్వాత కొద్దిసేపటికే బస్సు పూర్తిగా కాలిపోయింది. డ్రైవర్ అప్రమత్తత వల్ల పెద్ద ప్రమాదం తప్పిందని ప్రయాణికులు చెప్తున్నారు.

బస్సులో ఎక్కువ బెర్త్లు, కర్టెన్లు, పరుపులు ఉండడంతో మంటలు వేగంగా వ్యాపించాయని తెలుస్తోంది. ప్రకాశం జిల్లాలో మార్కాపురం దగ్గర ఇటీవల ఇలాంటి ఘటనే జరిగిందని ప్రయాణికులు గుర్తు చేస్తున్నారు.

ప్రైవేట్ ట్రావెల్స్ బస్సులు నిబంధనలు పాటించడం లేదని ప్రయాణికులు ఆరోపిస్తున్నారు. బస్సు బయలుదేరే ముందు ఆర్టీఓ అధికారులు తనిఖీలు చేయాలని కోరుతున్నారు. ప్రయాణికులందరినీ వేరే బస్సుల్లో వారి గమ్యస్థానాలకు పంపారు.