అమెరికాలో నల్గొండ యువతి అదృశ్యం: బోస్టన్ పోలీసుల గాలింపు

అమెరికాలో చదువుతున్న నల్గొండ జిల్లా యువతి కోయ శ్రీజా అదృశ్యమైన ఘటనపై బోస్టన్ పోలీసులు గాలింపు చేపట్టారు. నవంబర్ 4న బోస్టన్ పోలీసులు మిస్సింగ్ పర్సన్ అలర్ట్ జారీ చేశారు.

నల్గొండ జిల్లా కనగల మండలం శాబ్దులాపురం గ్రామానికి చెందిన శ్రీజా ఉన్నత చదువుల కోసం సుమారు ఏడాది క్రితం అమెరికా వెళ్లారు. బోస్టన్‌లో MS చదువుతూ పార్ట్ టైమ్ జాబ్ చేస్తున్నారు. నవంబర్ 2 రాత్రి సుమారు 9:45 గంటలకు బోస్టన్‌లోని డోర్చెస్టర్ ప్రాంతంలో ఎడిసన్ గ్రీన్‌లో ఉన్న తన నివాసం నుంచి బయటకు వెళ్లారు. ఆమె తిరిగి రాలేదు.

స్నేహితులు ఫోన్ చేసినా స్పందన లేకపోవడంతో నవంబర్ 3న బోస్టన్ పోలీసులకు ఫిర్యాదు చేశారు. ఆమె ఫోన్ చివరి లొకేషన్ ఆధారంగా కార్సన్ బీచ్ హార్బర్ పరిసరాల్లో పోలీసులు గాలిస్తున్నారు. అదృశ్యం కావడానికి ముందు ఆమె చివరిసారిగా ఎవరితో మాట్లాడారనే కోణంలోనూ దర్యాప్తు జరుగుతోంది.

కుమార్తె ఆచూకీ తెలియక తల్లిదండ్రులు ఆందోళన చెందుతున్నారు. కుటుంబ సభ్యులు మంత్రి కోమటిరెడ్డి వెంకట్ రెడ్డికి విషయం తెలియజేశారు. ఆయన అమెరికన్ ఎంబెసీ అధికారులతో మాట్లాడి ఆమె ఆచూకీ కోసం చర్యలు చేపట్టారు.

కుటుంబ సభ్యుల కథనం ప్రకారం, శ్రీజా తన రూమ్‌కు వచ్చి వాకింగ్‌కు వెళ్తానని చెప్పి బయటకు వెళ్లారు. సుమారు ఒక కిలోమీటర్ దూరం వెళ్లిన తర్వాత ఆమె కనిపించలేదు. ఘటన జరిగి ఐదో రోజు నాటికి ఆమె ఆచూకీ ఇంకా తెలియరాలేదు.