కృష్ణ అంగారక చతుర్దశి, మాస శివరాత్రి: విశేష పూజలు, మంత్రాలు

ఈ రోజు కృష్ణ అంగారక చతుర్దశి, మాస శివరాత్రి కలిసి వచ్చాయి. కృష్ణ పక్షంలో చతుర్దశి మంగళవారం వస్తే దాన్ని కృష్ణ అంగారక చతుర్దశిగా పిలుస్తారు. ఈ రోజు చేసే స్నాన, దాన, జపాలకు సూర్యగ్రహణం రోజు ఫలితాలు లభిస్తాయని ధర్మశాస్త్రాలు తెలియజేస్తున్నాయి.

పండితుల వివరాల ప్రకారం, ఈ రోజు నీటిలో కొద్దిగా గంగాజలం కలిపి స్నానం చేయాలి. అనంతరం సూర్యుడికి, యమధర్మరాజుకు తర్పణాలు ఇవ్వడం శ్రేష్ఠం. ఆహారంలో యవలు (బార్లీ) తీసుకోవడం లేదా దానం చేయడం మంచిదని శాస్త్రాలు చెబుతున్నాయి. 'ఓం అం అంగారకాయ నమః' మంత్రాన్ని దీపారాధన తర్వాత 21 సార్లు జపించాలి.

ఇదే రోజు మాస శివరాత్రి కూడా. ప్రదోష కాలంలో శివాలయ దర్శనం, చండీ ప్రదక్షిణ సమస్త శుభ ఫలితాలు కలిగిస్తాయి. ఇంట్లో ఉన్నవారు తుమ్మి పూలతో శివుడిని పూజించి చిమ్మిలి నైవేద్యంగా సమర్పించవచ్చు. నల్ల కలువ పూలు శివునికి ప్రీతిపాత్రమైనవని, వాటిని మాలికగా సమర్పిస్తే 100 కోట్ల కల్పాలు కైలాసంలో ఉండే యోగం కలుగుతుందని శివ ధర్మశాస్త్రం పేర్కొంటోంది.

మాస శివరాత్రి నాడు ప్రదోష కాలంలో 'ఓం నటరాజాయ విద్మహే మహా తాండవాయ ధీమహి తన్నః శివః ప్రచోదయాత్' అనే నటరాజ గాయత్రి మంత్రం జపిస్తే విశేష ఫలితాలు కలుగుతాయి. ఈ రెండు మంత్రాలను జపించి సమస్త శుభ ఫలితాలు పొందవచ్చని శాస్త్రగ్రంథాలు వివరిస్తున్నాయి.