ఎల్నినోతో కృష్ణమ్మ బోసి.. ప్రాణహితకు వరద

ఎల్నినో ప్రభావంతో తెలంగాణలో కృష్ణా బేసిన్‌లో వర్షాలు లేక ప్రాజెక్టుల్లో నీటి నిల్వలు బాగా తగ్గాయి. మరోవైపు మహారాష్ట్రలో కురుస్తున్న భారీ వర్షాలతో ప్రాణహిత నదికి వరద ప్రారంభమైంది.

జోగులాంబ గద్వాల జిల్లా జూరాల ప్రాజెక్ట్ వద్ద ప్రస్తుతం 2.327 టీఎంసీల నీరు మాత్రమే నిల్వ ఉంది. గతేడాది మే 27 నుంచే వరద రావడంతో మే 29 నాటికి 7.78 టీఎంసీలకు చేరి, జూన్ మొదటి వారంలో పది గేట్లు ఎత్తి నీటిని దిగువకు విడుదల చేశారు. ఈ ఏడాది ఎగువన వర్షాలు లేక వరద రాకపోవడంతో ఆయకట్టు రైతులు ఆందోళన వ్యక్తం చేస్తున్నారు.

శ్రీశైలం ప్రాజెక్ట్ పరిస్థితి కూడా ఇదే తరహాలో ఉంది. గతేడాది మే 29న వరద మొదలై జూన్ నాటికి 70 టీఎంసీలకు నీటి నిల్వలు చేరాయి. ప్రస్తుతం వరద లేక నీటి మట్టం తగ్గింది.

కుమరంభీం ఆసిఫాబాద్ జిల్లా తుమ్మిడిహెట్టి వద్ద ప్రాణహిత నది మాత్రం ఉప్పొంగుతూ ప్రవహిస్తోంది. మహారాష్ట్రలో కురుస్తున్న భారీ వర్షాలతో నదిలోకి కొత్త నీరు చేరుతోంది. రెండు రోజులుగా ప్రవాహం పెరుగుతోంది. ఏటా జూన్ చివరి వారంలో వరద వచ్చేది, ఈసారి వానలు ఆలస్యం కావడంతో జూలై మొదటి వారంలో వరద మొదలైంది.

ఎల్నినో ప్రభావంతోనే కుంటాల జలపాతం కూడా ఎండిపోయింది. గతేడాది జూలై ప్రారంభంలో వరద నీటితో కళకళలాడిన ఈ జలపాతం ఇప్పుడు నీరులేక బోసిపోయింది.