గత ప్రభుత్వంలో కార్యకర్తల గౌరవం కాపాడలేకపోయాం: BRS వర్కింగ్ ప్రెసిడెంట్ కేటీఆర్

BRS వర్కింగ్ ప్రెసిడెంట్ కేటీఆర్ తమ పార్టీ అధికారంలో ఉన్నప్పుడు కార్యకర్తల గౌరవాన్ని కాపాడలేకపోయామని అంగీకరించారు. పార్టీ కార్యకర్తల సమావేశంలో ఆయన ఈ వ్యాఖ్యలు చేశారు.

ప్రభుత్వం వివిధ సంక్షేమ పథకాలను ఆన్‌లైన్ ద్వారా అమలు చేయడంతో కార్యకర్తలకు ప్రజల మధ్య గౌరవం దెబ్బతిన్నదని కేటీఆర్ తెలిపారు. పెన్షన్, రేషన్ కార్డులు, కళ్యాణ లక్ష్మి, రైతు బంధు వంటి పథకాలు నేరుగా లబ్ధిదారుల ఖాతాలకు చేరడంతో కార్యకర్తల పాత్ర తగ్గిందని, ఫలితంగా గ్రామాల్లో వారి పరువు ప్రతిష్టలు దెబ్బతిన్నాయని వివరించారు.

‘మొత్తం ప్రభుత్వంపైనే దృష్టి పెట్టాం, పార్టీపై ఎక్కువ దృష్టి పెట్టలేదు. కొత్త రాష్ట్రానికి పునాది వేయడంలో ఈ లోపం జరిగింది’ అని కేటీఆర్ తెలిపారు. రాబోయే ఎన్నికల్లో కేసీఆర్ మళ్లీ ముఖ్యమంత్రి అయితే, కార్యకర్తల సంక్షేమం, ప్రజల సంక్షేమం రెండింటినీ సమానంగా చూసే బాధ్యత తాను తీసుకుంటానని హామీ ఇచ్చారు.

2028 ఎన్నికలే లక్ష్యంగా పార్టీని గ్రామస్థాయి నుంచి బలోపేతం చేస్తామని కేటీఆర్ కార్యకర్తలకు భరోసా ఇచ్చారు. కార్యకర్తలే పార్టీకి మూలస్తంభాలని, ఇకపై ఇటువంటి లోపాలు పునరావృతం కాకుండా చూస్తామని చెప్పారు. ఈ వ్యాఖ్యలు BRS వర్గాల్లో చర్చనీయాంశంగా మారాయి.