ఫార్ములా ఈ కేసు: నేడు నాంపల్లి ఏసీబీ కోర్టుకు కేటీఆర్ హాజరు

BRS నేత కేటీఆర్ ఇవాళ నాంపల్లి ఏసీబీ కోర్టుకు హాజరు కానున్నారు. ఫార్ములా ఈ కార్ రేస్ కేసులో విచారణ జరగనుంది.

ఉదయం 9 గంటలకు ఆయన నార్సింగి నివాసం నుంచి బయలుదేరనున్నారు. 10:15 నిమిషాలకు కోర్టులో విచారణ జరగనుంది.

2023లో హైదరాబాద్‌లో ఫార్ములా ఈ రేస్ నిర్వహించారు. మొదటి రేసు తర్వాత రెండో రేసు నిర్వహణకు నిధుల బదలాయింపుపై వివాదం తలెత్తింది. ఎన్నికల ప్రవర్తనా నియమావళి అమల్లో ఉండగా, క్యాబినెట్ అనుమతి లేకుండా హెచ్ఎండీఏ నుంచి దాదాపు రూ.55 కోట్ల నిధులు ఫార్ములా ఈ ఆపరేషన్స్ సంస్థకు బదిలీ చేశారని ఏసీబీ ఆరోపించింది.

ఈ విషయంలో కేటీఆర్‌ను మొదటి నిందితుడిగా చేర్చి ఏసీబీ ఛార్జిషీట్ దాఖలు చేసింది. మాజీ ప్రత్యేక ప్రధాన కార్యదర్శి అరవింద్ కుమార్, హెచ్ఎండీఏ మాజీ చీఫ్ ఇంజనీర్ బీఎల్ రెడ్డి, స్పోర్ట్స్ కన్సల్టెంట్ గోవింద కిరణ్ మల్లేశ్వరరావు తదితరులను కూడా నిందితులుగా చేర్చారు. ఛార్జిషీట్‌ను పరిశీలించిన ఏసీబీ ప్రత్యేక కోర్టు సమన్లు జారీ చేసింది.

ఈ నెల 31న కేటీఆర్ కోర్టుకు హాజరు కావాలని సమన్లలో ఆదేశించారు. అయితే, ఈ కేసు రాజకీయ కక్ష సాధింపేనని బీఆర్ఎస్ ఆరోపిస్తోంది. ఏసీబీ ఆరోపణలపై కోర్టు విచారణ జరుగనుండటంతో ఈ కేసు రాజకీయంగా ప్రాధాన్యం సంతరించుకుంది.