కేసీఆర్ హయాంలో అప్పులు పెరిగినా సంక్షేమానికేనని కేటీఆర్ సమర్థన; రేవంత్ సర్కార్‌పై విమర్శలు

BRS కార్యనిర్వాహక అధ్యక్షుడు కేటీ రామారావు (KTR) మాజీ ముఖ్యమంత్రి కేసీఆర్ హయాంలో రాష్ట్ర అప్పు పెరిగినా, ఆ నిధులు సంక్షేమం, అభివృద్ధికే వినియోగించారని అన్నారు. ప్రస్తుత కాంగ్రెస్ ప్రభుత్వం మాత్రం 2.5 ఏళ్లలో భారీ అప్పు చేసినా ప్రజలకు ఉపయోగం లేకుండా పోయిందని విమర్శించారు.

పార్లమెంట్ సమాచారాన్ని ఉటంకిస్తూ KTR మాట్లాడుతూ, 2014లో కేసీఆర్ ప్రభుత్వం బాధ్యతలు స్వీకరించినప్పుడు రాష్ట్రంపై రూ.72,000 కోట్ల అప్పు ఉండేదన్నారు. 2023 డిసెంబర్ 3 నాటికి ఈ అప్పు రూ.3,52,700 కోట్లకు చేరిందని, అంటే కేసీఆర్ హయాంలో నికరంగా రూ.2,80,700 కోట్ల అప్పు పెరిగిందని చెప్పారు.

అయితే ఈ మొత్తాన్ని ప్రజల సంక్షేమానికి ఖర్చు చేశామని KTR పేర్కొన్నారు. పెన్షన్లు రూ.2000లకు పెంచడం, 46 లక్షల మందికి ఆసరా కల్పించడం, కల్యాణలక్ష్మీ/షాదీ ముబారక్ పథకం ద్వారా 14 లక్షల మంది ఆడపిల్లలకు రూ.లక్ష చొప్పున ఇవ్వడం, కేసీఆర్ కిట్ ద్వారా 15 లక్షల కుటుంబాలకు ఆర్థిక సాయం అందించడం,1000 గురుకుల పాఠశాలలు ఏర్పాటు చేయడం, వికారాబాద్ జిల్లాను కొత్తగా ఏర్పాటు చేసి మెడికల్, నర్సింగ్ కాలేజీలు ఇవ్వడం, 24 గంటల కరెంట్ కోసం లక్ష కోట్ల ఖర్చు, పాలమూరు-రంగారెడ్డి ఎత్తిపోతల పథకానికి రూ.30,000 కోట్ల వ్యయం జరిగిందని వివరించారు.

కేసీఆర్ ప్రభుత్వం చేసిన అప్పు ప్రజలకు మేలు చేసిందని చెప్పిన KTR, ప్రస్తుత రేవంత్ రెడ్డి ప్రభుత్వం 2.5 ఏళ్లలో రూ.4 లక్షల కోట్ల అప్పు చేసినట్లు ఆరోపించారు. కానీ రైతుల నుంచి ధాన్యం కొనడం, యూరియా సరఫరా, రైతు బంధు, విద్యుత్ సరఫరా వంటి వాటిలో ఆ డబ్బు కనిపించడం లేదన్నారు. ధాన్యం సంచులు కూడా ఇవ్వడం లేదని, ఆ నిధులు ఢిల్లీకి తరలిపోతున్నాయని విమర్శించారు. ఈ వ్యాఖ్యలపై కాంగ్రెస్ నేతల స్పందన తెలియాల్సి ఉంది.