BJP బలమున్న చోటులపై కేటీఆర్ ఫోకస్.. ఆదిలాబాద్ తర్వాత నిర్మల్‌లో సభ

BRS వర్కింగ్ ప్రెసిడెంట్ కేటీఆర్ ఉత్తర తెలంగాణ జిల్లాల్లో పర్యటనలు చేస్తున్నారు. BJP ప్రాబల్యం ఉన్న ప్రాంతాలపై ఆయన ప్రత్యేకంగా దృష్టి పెట్టారు. ఈ నెల 1న ఆదిలాబాద్‌లో భారీ బహిరంగ సభ నిర్వహించారు. ఈ నెల 11న నిర్మల్‌లో పెద్ద ఎత్తున బహిరంగ సభ ఏర్పాటు చేస్తున్నారు.

గత అసెంబ్లీ ఎన్నికల్లో ఆదిలాబాద్, నిర్మల్ ప్రాంతాల్లో BJP ఎమ్మెల్యేలు గెలిచారు. ఆదిలాబాద్ పార్లమెంట్ సీటును కూడా BJP దక్కించుకుంది. ఈ ప్రాంతంలో BJP క్షేత్రస్థాయిలో బలంగా ఉందని BRS నేతలు చెప్తున్నారు. మొదట BJP ఎమ్మెల్యేలు ఉన్న నియోజకవర్గాల్లో సభలు పెడతామని, తర్వాత BJP ఎంపీల ప్రాంతాల్లో సమావేశాలు నిర్వహిస్తామని వారు చెప్తున్నారు. ఇందులో భాగంగా మరికొద్ది రోజుల్లో నిజామాబాద్ పార్లమెంట్ పరిధిలో కూడా కేటీఆర్ సభ నిర్వహించనున్నారు.

గత ఎన్నికల్లో BJP అధికారంలోకి రాకపోయినా, BRSను అధికారం నుంచి దూరం చేయడంలో పాత్ర పోషించిందనే భావన BRS నేతల్లో ఉంది. BJP బలమున్న చోట్ల సభలు చేయడం వెనుక రెండు లక్ష్యాలు ఉన్నాయని పార్టీ వర్గాలు చెప్తున్నాయి. ఒకటి ఆ ప్రాంతాల్లో తమ ప్రాబల్యం పెంచుకోవడం. రెండు, BRS–BJP పొత్తు ఉందనే విమర్శలకు చెక్ పెట్టడం.

వచ్చే ఏడాది ప్రారంభంలో తెలంగాణలో రెండు గ్రాడ్యుయేట్ MLC స్థానాలకు ఎన్నికలు జరగనున్నాయి. అప్పుడు హైదరాబాద్, రంగారెడ్డి, మహబూబ్‌నగర్, నల్గొండ, వరంగల్, ఖమ్మం జిల్లాలపై ఎక్కువ దృష్టి పెట్టాల్సి ఉంటుంది. అందుకే ఇప్పుడు మిగతా జిల్లాలను కేటీఆర్ కవర్ చేస్తున్నారని BRS నేతలు చెప్తున్నారు. రాష్ట్రంలో అసెంబ్లీ ఎన్నికలకు ఇంకా రెండేళ్ల సమయం ఉంది. ఈ పర్యటనలపై BJP స్పందన లభ్యం కాలేదు.