రంగారెడ్డి జిల్లాలో మల్బరీ పండ్ల సాగు.. రైతులకు రోజువారీ ఆదాయం

రంగారెడ్డి జిల్లా కందుకూరు మండలం సరస్వతిగూడ గ్రామంలో రైతులు మల్బరీ పండ్ల తోటలు సాగు చేస్తున్నారు. దాదాపు 100 మంది రైతులు ఎకరం నుంచి ఒకటిన్నర ఎకరాల విస్తీర్ణంలో ఈ తోటలు వేసి రోజువారీ ఆదాయం పొందుతున్నారు.

గ్రామంలో సుమారు 150 కుటుంబాలు జీవనం సాగిస్తున్నాయి. వీరిలో 70 శాతం మంది చిన్న, సన్నకారు రైతులే. గతంలో ఇక్కడ బొప్పాయి, జామ తోటలు పండించేవారు. ఈ ప్రాంతంలో వర్షపాతం చాలా తక్కువ. ఉన్న కొద్దిపాటి నీటితో పంటలు సరిగ్గా పండేవి కావు. మల్బరీ పండ్లకు మార్కెట్‌లో డిమాండ్ ఉండటంతో మొదట కొందరు రైతులు కొద్ది విస్తీర్ణంలో ప్రయోగాత్మకంగా నాటారు. ఆ తర్వాత ఊరంతా ఈ సాగు వైపు మళ్లింది.

మల్బరీకి విత్తనాలు ఉండవు. మొక్క కొమ్మను కత్తిరించి నాటుకోవాలి. నాటిన రెండేళ్లకు పండ్ల దిగుబడి మొదలవుతుంది. ఏడాది పొడవునా పండ్లు కాస్తాయి. ప్రతి 30 నుంచి 35 రోజులకు ఒకసారి ఆకులు తీసి చెట్టును కత్తిరించాలి. దీన్ని ట్యూనింగ్ అంటారు. పక్షులు ఈ పండ్లను ఎక్కువగా తినేస్తాయి. వాటి నుంచి కాపాడుకోవడానికి రైతులు చేపల వలలను చెట్ల పైభాగంలో కడుతున్నారు.

ప్రస్తుతం కిలో మల్బరీ పండు ₹150 నుంచి ₹200 వరకు అమ్ముడవుతోంది. గతంలో ఈ ధర కిలో ₹500 నుంచి ₹700 వరకు ఉండేది. ఒక రైతు రోజుకు సుమారు 25 కిలోలు తీసి ₹2,000 నుంచి ₹2,500 వరకు ఆదాయం పొందుతున్నారు. గ్రామం నుంచి రోజుకు 200 నుంచి 300 కిలోలు హైదరాబాద్ మార్కెట్‌కు వెళ్తున్నాయి. కూలీలకు రోజుకు ₹200 నుంచి ₹300 వరకు చెల్లిస్తున్నారు. అధికారులు వారానికి ఒకసారి వచ్చి రైతులతో మాట్లాడి తోటల లాభాలను వివరిస్తున్నారు.

ఈ ప్రాంతంలో నీటి సౌకర్యం తక్కువగా ఉంది. డ్రిప్ ఇరిగేషన్ పరికరాలను సబ్సిడీపై ఇవ్వాలని రైతులు ప్రభుత్వాన్ని కోరుతున్నారు. మల్బరీతో పాటు కూరగాయలు, ఆకుకూరలు కూడా సాగు చేస్తున్నారు. కూరగాయల ఆదాయాన్ని రోజువారీ ఖర్చులకు, మల్బరీ పండ్ల ఆదాయాన్ని లాభాలకు ఉపయోగిస్తున్నారు.

చెట్లకు ఆరు నెలలకు ఒకసారి ఎరువు వేస్తారు. పురుగులు సోకితే మందులు పిచికారీ చేస్తారు. ఆకు తీసిన 30 నుంచి 45 రోజులకు మళ్లీ కొత్త కాపు వస్తుంది.