2028 ఎన్నికల లక్ష్యంగా కేటీఆర్ 2027లో పాదయాత్ర చేపట్టనున్నారు

బీఆర్ఎస్ వర్కింగ్ ప్రెసిడెంట్ కె.టి. రామారావు (కేటీఆర్) 2027లో పాదయాత్ర చేపట్టనున్నారు. 2028 అసెంబ్లీ ఎన్నికల్లో మళ్లీ అధికారం సాధించే లక్ష్యంతో ప్రజల్లోకి వెళ్లేందుకు ఈ నిర్ణయం తీసుకున్నారు. మార్చి నెలలో తొలి విడత పాదయాత్ర ప్రారంభం కానుందని పార్టీ వర్గాలు తెలిపాయి.

ఈ పాదయాత్రలో బీఆర్ఎస్ పదేళ్ల పాలనలో చేపట్టిన అభివృద్ధి, సంక్షేమ కార్యక్రమాలను ప్రజలకు వివరించనున్నారు. ప్రస్తుత కాంగ్రెస్ ప్రభుత్వం ఎన్నికల్లో ఇచ్చిన హామీలను అమలు చేయలేదని ప్రజల్లోకి తీసుకెళ్తామని బీఆర్ఎస్ నాయకులు పేర్కొన్నారు. యువత, రైతులు, మహిళలు, నిరుద్యోగులు, పట్టణ ఓటర్లను నేరుగా కలవడం ఈ యాత్ర లక్ష్యంగా ఉంటుందని పార్టీ వర్గాలు తెలియజేశాయి.

కేటీఆర్ పాదయాత్ర తర్వాత బీఆర్ఎస్ అధ్యక్షుడు కె. చంద్రశేఖర రావు (కేసీఆర్) బస్సు యాత్ర చేపట్టే అవకాశం ఉందని పార్టీ వర్గాలు చెబుతున్నాయి. ఏయే నియోజకవర్గాలను కవర్ చేయాలి, ఏ సామాజిక వర్గాలపై దృష్టి పెట్టాలనే అంశాలపై పార్టీ నాయకత్వం కసరత్తు చేస్తున్నట్లు సమాచారం.