కన్నెపల్లి పంప్ హౌస్ పరిశీలనకు KTR బయలుదేరిక — వరంగల్‌లో ఉద్రిక్తత

BRS వర్కింగ్ ప్రెసిడెంట్ KTR భూపాల జిల్లాలోని కన్నెపల్లి పంప్ హౌస్ పరిశీలనకు బయలుదేరారు. కాళేశ్వరం ప్రాజెక్ట్ కింద వృధాగా పోతున్న జలాలను లిఫ్ట్ చేసి వివిధ ప్రాజెక్టులకు మళ్ళించాలని BRS డిమాండ్ చేస్తోంది. ఈ పర్యటనలో వరంగల్, కరీంనగర్, నల్గొండ జిల్లాల సీనియర్ నేతలతో పాటు పలువురు మాజీ మంత్రులు కూడా పాల్గొన్నారు.

ఎగువ ప్రాంతం నుండి కురుస్తున్న భారీ వర్షాల నేపథ్యంలో గోదావరిలోకి వస్తున్న 60 వేల క్యూసెకుల నీటిని ఒడిసి పట్టుకోవాలని BRS పార్టీ కోరుతోంది. కేవలం 32 శాతం నీటి లభ్యత మాత్రమే ఉన్న తరుణంలో ఈ డిమాండ్ మరింత ప్రాముఖ్యత సంతరించుకుంది.

KTR పర్యటన నేపథ్యంలో జనగాం వద్ద ఆయనను అడ్డుకొనేందుకు పోలీసు బలగాలు భారీగా మోహరించాయి. తెల్లవారు జామున నుండే ఉమ్మడి వరంగల్ జిల్లాలో BRS నేతలను అరెస్టు చేయడం మొదలైంది. పలువురు నేతలను హౌస్ అరెస్టు చేసినట్టు కూడా తెలుస్తోంది.

ప్రభుత్వం నుండి ఆదేశాలు ఉన్నాయని పేర్కొంటూ KTR ను ఖచ్చితంగా అడ్డుకుంటామని పోలీసులు స్పష్టం చేశారు. కన్నెపల్లి పంప్ హౌస్ వద్ద ఉద్రిక్తత ఏర్పడే అవకాశం ఉన్నందున కార్యకర్తలను అక్కడికి రాకుండా BRS ముందస్తుగా జాగ్రత్తపడింది.

కాంగ్రెస్ పార్టీ మాత్రం కాళేశ్వరం ప్రాజెక్ట్ లేకపోయినా తెలంగాణలో లక్షల మెట్రిక్ టన్నుల వరి పండిందని వ్యాఖ్యానించింది. కాళేశ్వరం ప్రాజెక్ట్‌ను BRS పార్టీ ATM గా వాడుకుందని కాంగ్రెస్ ఆరోపించింది. మరో గంట రెండు గంటల్లో KTR జనగాం వద్దకు చేరుకునే అవకాశం ఉన్న నేపథ్యంలో పరిస్థితి ఎలా ఉంటుందో వేచి చూడాలి.