2 లక్షల ఉద్యోగాల హామీ అమలు చేయాలి, లేదంటే ఢిల్లీలో నిరసన: రాహుల్‌కు కేటీఆర్ హెచ్చరిక

బీఆర్ఎస్ నేత, మాజీ మంత్రి కేటీఆర్ కాంగ్రెస్ సీనియర్ నేత రాహుల్ గాంధీని ఉద్యోగాల హామీపై తీవ్రంగా టార్గెట్ చేశారు. తెలంగాణ అసెంబ్లీ ఎన్నికల సమయంలో రాహుల్ గాంధీ ఇచ్చిన రెండు లక్షల ప్రభుత్వ ఉద్యోగాల హామీ ఇప్పటికీ నెరవేర్చలేదని, 32 నెలలు గడిచినా కేవలం 10 వేల ఉద్యోగాలు మాత్రమే ఇచ్చారని ఆయన విమర్శించారు. ప్రైవేట్ రంగంలోనూ ఉద్యోగాలు తగ్గుతున్నాయని చెప్పారు.

ఖమ్మం జిల్లాకు చెందిన వేణు అనే యువకుడు రాహుల్ గాంధీకి ఉత్తరం రాసి ఆత్మహత్యాయత్నం చేశాడని కేటీఆర్ తెలిపారు. ఆ యువకుడు ప్రస్తుతం ఆస్పత్రిలో మృత్యువుతో పోరాడుతున్నాడు. రాహుల్ గాంధీ స్పందించకపోవడంపై ఆగ్రహం వ్యక్తం చేశారు.

డిప్యూటీ సీఎం భట్టి విక్రమార్క తెలంగాణ ఇంజనీరింగ్ విద్యార్థులను క్రిమినల్ వేస్ట్ అని అన్నా, పోలీస్ కానిస్టేబుల్ రిక్రూట్మెంట్ కోసం పోరాడే అభ్యర్థులను కించపరిచినా రాహుల్ గాంధీ మౌనంగా ఉన్నారని కేటీఆర్ మండిపడ్డారు. "మీరు వోటు అడగడానికి వస్తారు, కానీ యువత ప్రశ్నలు అడిగినప్పుడు మాత్రం కనిపించడం లేదు" అని అన్నారు.

రాహుల్ గాంధీ హైదరాబాద్ వచ్చి యువతతో చర్చించి తమ ఉద్యోగ హామీ అమలుపై వివరణ ఇవ్వాలని కేటీఆర్ డిమాండ్ చేశారు. లేకపోతే తెలంగాణ నిరుద్యోగ యువతను వెంటబెట్టుకుని ఢిల్లీ వెళ్లి రాహుల్ గాంధీ ఇంటి ముందు ధర్నా చేస్తామని హెచ్చరించారు.

కాంగ్రెస్ ప్రభుత్వం జాబ్ క్యాలెండర్ పేరుతో రెండేళ్లుగా నాటకం ఆడుతోందని, ఇప్పటి వరకు కేవలం 5,000 నోటిఫికేషన్లు మాత్రమే జారీ చేసిందని కేటీఆర్ విమర్శించారు. ఈ నేపథ్యంలో రాహుల్ గాంధీ స్పందించాల్సిన అవసరం ఉంది.