బోనాల సందర్భంగా ఉజ్జయినీ మహంకాళి ఆలయాన్ని సందర్శించిన కేటీఆర్

బోనాల పండుగ సందర్భంగా బీఆర్ఎస్ ఎమ్మెల్యే కేటీఆర్ సికింద్రాబాద్‌లోని ఉజ్జయినీ మహంకాళి అమ్మవారిని దర్శించుకున్నారు. రాష్ట్రంలో మంచి వర్షాలు కురిసి, ప్రజలు సుభిక్షంగా ఉండాలని ఆయన అమ్మవారిని ప్రార్థించారు.

అనంతరం ఆయన మాట్లాడుతూ, గతంలో బీఆర్ఎస్ ప్రభుత్వం బోనాలను రాష్ట్ర పండుగగా గుర్తించిందని గుర్తు చేశారు. ఆనాడు ప్రభుత్వం తరపున తాము బంగారు బోనం సమర్పించామన్నారు. కేసీఆర్ నేతృత్వంలో యాదాద్రి లక్ష్మీనరసింహ స్వామి దేవాలయం పునరుద్ధరణకు రూ. 1800 కోట్లు కేటాయించారని తెలిపారు. హైదరాబాద్‌లోని వివిధ ఆలయాల నిర్వహణకు రూ. 25 కోట్లు విడుదల చేసి, ఆలయ కమిటీలకు ఆర్థిక సహకారం అందించామన్నారు.

ఈ సందర్భంగా కేటీఆర్‌తో పాటు పలువురు బీఆర్ఎస్ నాయకులు, కార్యకర్తలు ఆలయానికి వచ్చారు.