కూకట్‌పల్లి పోలీసుల చాకచక్యం: ఆటోలో మర్చిపోయిన 20 తులాల బంగారం రికవరీ

హైదరాబాద్‌లోని కూకట్‌పల్లి పోలీసులు ఆటోలో మర్చిపోయిన బంగారు ఆభరణాలను రికవరీ చేశారు. సుమారు 20 తులాల బంగారం తిరిగి లభించింది. వెండితో పాటు డైమండ్ నెక్లెస్ కూడా రికవరీ అయింది.

మూసాపేట రెయిన్‌బో విస్టాకు చెందిన ఓ మహిళ ఈ నెల 23న కూకట్‌పల్లిలోని బ్యాంక్ లాకర్ నుంచి బంగారం తీసుకున్నారు. అంజనేయ నగర్ క్రాస్ రోడ్డు దగ్గర ఆటో ఎక్కి ఇంటికి బయలుదేరారు. ఆ సమయంలో బంగారం ఉన్న బ్యాగ్‌ను ఆటోలోనే మర్చిపోయారు.

బాధితురాలి ఫిర్యాదు మేరకు పోలీసులు దర్యాప్తు చేపట్టారు. సమీపంలోని CCTV ఫుటేజీని పరిశీలించి ఆటోను గుర్తించారు. ఆటో డ్రైవర్‌ను కస్టడీలోకి తీసుకుని ఆభరణాలను స్వాధీనం చేసుకున్నారు.

ఆటోను గుర్తించడంలో కీలక పాత్ర పోషించిన సిబ్బందిని కూకట్‌పల్లి జోన్ DCP అభినందించారు. ఘటన జరిగిన రోజు సాయంత్రమే ఫిర్యాదు ఇచ్చామని బాధిత కుటుంబం తెలిపింది. మరుసటి రోజు ఉదయం నాగార్జున రెడ్డి, SI శ్రీనివాస్ వెంటనే స్పందించి CCTV ఫుటేజీని సేకరించి పరిశీలించారని వారు చెప్పారు.

తిరిగి బంగారం దొరుకుతుందని అనుకోలేదని బాధితురాలు అన్నారు. హైదరాబాద్ పోలీసులకు హ్యాట్సాఫ్ అని ఆమె వ్యాఖ్యానించారు. తమకు అండగా నిలిచిన పోలీసులకు జీవితాంతం కృతజ్ఞులమని కుటుంబ సభ్యులు తెలిపారు.