పార్వతీపురం మన్యం జిల్లాలో పోలింగ్ బూత్‌లో వృద్ధురాలికి అస్వస్థత

పార్వతీపురం మన్యం జిల్లా జగన్నాథపురంలోని పోలింగ్ కేంద్రంలో ఓటు వేయడానికి వచ్చిన వృద్ధురాలు కళ్ళు తిరిగి కిందపడిపోయారు.

రెండో వార్డు పరిధిలోని వ్యవసాయ మార్కెటింగ్ యార్డులో ఏర్పాటు చేసిన పోలింగ్ బూత్‌లో ఈ ఘటన జరిగింది. ఓటు వేసేందుకు వచ్చిన ఆ వృద్ధ మహిళ అక్కడే కళ్ళు తిరిగి పడిపోయారు. ఆమెను అక్కడ ఉన్నవారు ఆదుకున్నారు.

పోలింగ్ కేంద్రంలో వృద్ధులకు వీల్‌చెయిర్ సదుపాయం కూడా లేదని ఓటర్లు అసంతృప్తి వ్యక్తం చేస్తున్నారు.

స్థానికంగా ఉన్న ఓ మహిళ మాట్లాడుతూ తాను లోపలికి వెళ్లి మందులు ఇచ్చానని, ఆ తర్వాత వృద్ధురాలు లేచారని తెలిపారు.

ఈ ఘటనపై అధికారుల స్పందన తెలియాల్సి ఉంది.