సరఫరా తగ్గడంతో హైదరాబాద్‌లో కూరగాయల ధరలు పెరుగుదల

హైదరాబాద్ మార్కెట్లలో కూరగాయల ధరలు పెరిగాయి. ఆఫ్ సీజన్ కారణంగా మార్కెట్లకు కూరగాయలు, ఆకుకూరల సరఫరా తగ్గింది. డిమాండ్‌కు తగ్గట్టుగా సరఫరా రాకపోవడంతో ధరలు పెరుగుతున్నాయి.

నిత్యం వంటల్లో వాడే కూరగాయల కొనుగోలుకే ఎక్కువ ఖర్చు చేయాల్సి వస్తోంది. సాధారణంగా మార్కెట్లలో విస్తృతంగా కనిపించే కూరగాయల రకాలు ప్రస్తుతం తగ్గిపోయాయి.

దిగుబడులు తగ్గడంతో మార్కెట్లకు సరఫరా పరిమితం అయిందని రైతులు, వ్యాపారులు చెప్తున్నారు. వర్షాలు లేకపోవడంతో పంటలు ఎండిపోయాయని రైతులు తెలిపారు. బోరుబావులు ఎండిపోవడంతో సాగు నీరు లేదని వారు చెప్పారు. పచ్చిమిర్చి సరఫరా కూడా తగ్గిందని వ్యాపారులు తెలిపారు.

స్థానిక పంటలు తగ్గడంతో హైదరాబాద్ మార్కెట్లు ఇతర రాష్ట్రాలపై ఆధారపడుతున్నాయి. మహారాష్ట్ర నుంచి దొండకాయ, బజ్జిమిర్చి, టమాటా వస్తున్నాయి. కర్ణాటక, ఆంధ్రప్రదేశ్ నుంచి కూడా కూరగాయలు తీసుకొస్తున్నారు. అయినా అన్ని రకాల కూరగాయలు ఆశించిన స్థాయిలో అందుబాటులో లేవు.

రవాణా ఖర్చులు కూడా ధరల పెరుగుదలకు తోడవుతున్నాయి. హోల్‌సేల్ మార్కెట్ల ధరల ప్రభావం రిటైల్ మార్కెట్లపై పడుతోంది. దీంతో వ్యాపారులు కూడా ఇబ్బందులు ఎదుర్కొంటున్నారు.