కాంగ్రెస్‌పై అసంతృప్తి వ్యక్తం చేసిన సీపీఐ ఎమ్మెల్యే కూనంనేని సాంబశివరావు

సీపీఐ ఎమ్మెల్యే కూనంనేని సాంబశివరావు కాంగ్రెస్ పార్టీపై తీవ్ర అసంతృప్తి వ్యక్తం చేశారు. కూటమిలో భాగస్వామిగా ఉన్నప్పటికీ కాంగ్రెస్ తమను పట్టించుకోవడం లేదని ఆయన ఆగ్రహం వ్యక్తం చేశారు.

పినపాక నియోజకవర్గంలో సీపీఐ ప్రజా చైతన్య యాత్రలో పాల్గొన్న ఆయన మాట్లాడుతూ, ‘మీ పతనాన్ని మీరే రాసుకుంటే ఎవరూ కాపాడలేరు’ అని హెచ్చరించారు. బీజేపీ వంటి పార్టీ రాకుండా ఉండేందుకే కాంగ్రెస్‌కు మద్దతు ఇచ్చామని, కానీ కాంగ్రెస్ అవమానిస్తే బీఆర్ఎస్‌కు పట్టిన గతే పడుతుందని అన్నారు.

తాము పెద్ద పదవులు కోరుకోవడం లేదని, స్నేహ ధర్మం పాటించాలని కోరారు. లేకపోతే కాంగ్రెస్‌ను రక్షించేవారు ఉండరని హెచ్చరించారు. అవసరమైతే పినపాక స్థానం నుంచి తిరిగి పోటీ చేస్తామని కూడా ఆయన స్పష్టం చేశారు.

తెలంగాణలో కాంగ్రెస్ ప్రభుత్వానికి సీపీఐ మద్దతు ఇస్తోంది. ఈ నేపథ్యంలో కూటమి భాగస్వామి నుంచి బహిరంగ విమర్శ రావడం రాజకీయంగా చర్చనీయాంశమైంది.