ఎల్‌నినో ప్రభావంతో రైతులు అప్రమత్తంగా ఉండాలి: కర్నూలు కలెక్టర్

కర్నూలు జిల్లా కలెక్టర్ సిరి ఎల్‌నినో ప్రభావం నేపథ్యంలో రైతులకు పలు సూచనలు చేశారు. ప్రత్యామ్నాయ పంటల వైపు దృష్టి సారించాలని, ప్రభుత్వం ప్రోత్సహిస్తున్న ప్రీ మాన్సూన్ డ్రై సోయింగ్ (పీఎండీఎస్) పద్ధతిని అవలంబించాలని కోరారు.

జిల్లాలో 92 వేల ఎకరాల్లో పీఎండీఎస్ లక్ష్యంగా నిర్ణయించగా, ఇప్పటికే 74 వేల ఎకరాల్లో పూర్తి చేసినట్లు తెలిపారు. పత్తి ప్రధాన పంటగా సాగు చేస్తున్న రైతులు కూడా ఈ పద్ధతిని అనుసరించాలన్నారు. మరో లక్ష ఎకరాల్లో పశుగ్రాసం పంటలు సాగు చేయించాలని అధికారులను ఆదేశించారు.

పంటల బీమా ప్రీమియం చెల్లింపుపై కలెక్టర్ స్పష్టమైన గడువులు ప్రకటించారు. పత్తి, వేరుశెనగ పంటలకు జులై 15 వరకు, మిగిలిన అన్ని పంటలకు జులై 31 వరకు అవకాశం ఉందని చెప్పారు. ఎలాంటి పంట నష్టం జరిగినా రైతుకు ఆర్థిక రక్షణ లభించేలా సకాలంలో ప్రీమియం చెల్లించాలని సూచించారు.

పీఎండీఎస్ విధానాన్ని స్వయంగా వివరించిన కలెక్టర్, విత్తనాలను ద్రవజీవామృతం, ఘనజీవామృతం, బూడిదతో కలిపి పెలెట్‌లుగా తయారు చేసి పొలంలో జల్లుతారని తెలిపారు. వర్షం పడే వరకు ఈ విత్తనాలు అలాగే ఉండి, తర్వాత మొలకెత్తుతాయని, దీని వల్ల ప్రధాన పంటకు రక్షణ లభిస్తుందన్నారు.

బీమా కవరేజ్ ఉదాహరణలు ఇస్తూ... పత్తికి ఎకరాకు రూ.2000 ప్రీమియం చెల్లిస్తే రూ.48,000 వరకు, వేరుశెనగకు రూ.560 చెల్లిస్తే రూ.28,000 వరకు పరిహారం వస్తుందని వివరించారు. అన్ని శాఖల అధికారులు సమన్వయంతో రైతులను ఆదుకోవాలని కలెక్టర్ ఆదేశించారు.