లాల్ దర్వాజా మహంకాళీ ఆలయ 118వ వార్షికోత్సవాలు ప్రారంభం

లాల్ దర్వాజా మహంకాళీ ఆలయంలో 118వ వార్షికోత్సవాలు ప్రారంభమయ్యాయి. సీపీ సత్యనారాయణ, జీహెచ్ఎంసీ జోనల్ కమిషనర్ సత్యనారాయణ కలిసి శిఖర పూజ, ధ్వజారోహణ చేసి ఉత్సవాలను ప్రారంభించారు. తొమ్మిది రోజుల పాటు అమ్మవారిని వివిధ రూపాల్లో అలంకరించి పూజలు నిర్వహిస్తారు.

ఈ కార్యక్రమంలో పాల్గొనడం సంతోషంగా ఉందని అధికారులు తెలిపారు. రాష్ట్రంలో బోనాల పండుగను అత్యంత వైభవంగా నిర్వహిస్తామన్నారు. అన్ని శాఖల సమన్వయంతో పండుగను ప్రశాంతంగా నిర్వహిస్తున్నామని చెప్పారు.

భక్తులకు ఎలాంటి అసౌకర్యం కలగకుండా పోలీసులు విస్తృత భద్రతా ఏర్పాట్లు చేశారు. సుమారు 2,000 మంది సిబ్బందిని మోహరించారు. 100కు పైగా సీసీ కెమెరాలు, డ్రోన్లతో నిఘా ఏర్పాటు చేశారు. చైన్ స్నాచింగ్, మొబైల్ స్నాచింగ్ నిరోధించేందుకు షీ టీమ్లను నియమించారు. పబ్లిక్ రద్దీని అంచనా వేసేందుకు కొత్త టెక్నాలజీని ప్రయోగాత్మకంగా వాడుతున్నారు. గత సంవత్సరాల ఇబ్బందులను అధ్యయనం చేసి భద్రత ఏర్పాటు చేసినట్లు అదనపు సీపీ తాప్సీ, డీసీపీ కిరణ్, రక్షితామూర్తి నేతృత్వంలో పోలీసులు తెలిపారు.

ప్రజలు ఆలయానికి వచ్చి దర్శనం చేసుకోవాలని, ప్రశాంత వాతావరణంలో పండుగను జరుపుకోవాలని అధికారులు కోరారు. గోల్కొండ, బల్కంపేట బోనాలు ఇప్పటికే ప్రశాంతంగా ముగిశాయని పేర్కొన్నారు.