లలితా సహస్రనామ స్తోత్రం పఠించడానికి శ్రేష్ఠమైన సమయాలు — బ్రహ్మాండ పురాణం

బ్రహ్మాండ పురాణం ప్రకారం, లలితా సహస్రనామ స్తోత్రం కొన్ని ప్రత్యేకమైన సమయాల్లో పఠిస్తే విశేషమైన ఫలితాలు కలుగుతాయని హయగ్రీవుడు అగస్త్య మహర్షికి చెప్పినట్లు పేర్కొంటారు.

ఆ ప్రత్యేక సమయాలు ఏంటంటే — సూర్యుడు ఒక రాశి నుంచి మరో రాశిలోకి మారే రవి సంక్రమణ రోజు, సంవత్సరానికి రెండుసార్లు వచ్చే విషువత్ కాలం (పగలు రాత్రి సమానంగా ఉండే రోజు), నవమి తిధి, చతుర్దశి తిధి, మరియు పౌర్ణమి రోజు ముఖ్యమైనవిగా చెప్పారు. అంతేకాదు, ఒక్కొక్కరు తాము జన్మించిన తిధి నుండి మూడో తిధి రోజు కూడా ఈ స్తోత్రం పఠించడం శ్రేష్ఠమని పేర్కొన్నారు.

పౌర్ణమి రోజు వెన్నెలలో లలితా సహస్రనామ పారాయణ చేసి, పంచోపచార పూజ నిర్వహించి, ఆవుపాల పాయసం నైవేద్యంగా సమర్పించాలని బ్రహ్మాండ పురాణం సూచిస్తుంది.

ఒక సంవత్సరం పాటు శ్రద్ధగా, ఏకాగ్రతతో నిత్యమూ లలితా సహస్రనామం పఠిస్తే అద్భుతమైన మార్పులు కలుగుతాయని పురాణ వచనం తెలుపుతుంది.

సంపూర్ణ స్తోత్రం పఠించలేని వారికి శుక్రవారం రోజు దీపారాధన అనంతరం "ఓం ఐం హ్రీం శ్రీం శ్రీ లలితా త్రిపుర సుందర్యై నమః" అనే మంత్రాన్ని 108, 54 లేదా 21 సార్లు జపించవచ్చని సూచించారు.