SIR ప్రక్రియ గడువు పొడగించాలని నాయకులు, ప్రజల విజ్ఞప్తి

తెలంగాణ రాష్ట్రంలో స్పెషల్ ఇంటెన్సివ్ రివిజన్ అంటే SIR ప్రక్రియ చాలా నెమ్మదిగా కొనసాగుతోంది. ఓటర్లకు అందించిన ఎన్యుమరేషన్ ఫారాలను డిజిటలైజేషన్ చేయడంలో తీవ్రమైన జాప్యం జరుగుతున్నట్లు తెలుస్తోంది. రాష్ట్రవ్యాప్తంగా మొత్తం మూడు కోట్ల ముప్పై ఎనిమిది లక్షల ఇరవై ఆరు వేల నాలుగు వందల నలభై ఎనిమిది మంది ఓటర్లలో కేవలం కోటి అరవై ఆరు లక్షల డెబ్బై వేల ఆరు వందల పది మంది వివరాలు మాత్రమే ఇప్పటివరకు డిజిటలైజ్ అయ్యాయి.

హైదరాబాద్, రంగారెడ్డి, మేడ్చల్ జిల్లాల పరిధిలో అత్యధికంగా దాదాపు కోటికి పైగా మంది ఓటర్లు ఉండగా, అందులో కేవలం ఇరవై ఎనిమిది లక్షా నలభై ఆరు వేల మంది వివరాలు మాత్రమే ఆన్లైన్ అయ్యాయి. వలసలు ఎక్కువగా ఉండడం, కొన్ని ఇళ్లకు తాళాలు వేసి ఉండడం, గేటెడ్ కమ్యూనిటీలలో BLO లకు చేరుకోలేకపోవడం, యాప్ లో సాంకేతిక సమస్యలు వంటి కారణాలతో SIR ప్రక్రియ వెనుకబడినట్లు అర్థమవుతోంది.

ఈ నేపథ్యంలో రాష్ట్ర ప్రధాన ఎన్నికల అధికారి సుదర్శన్ రెడ్డికి మంత్రి పొన్నం ప్రభాకర్ SIR ప్రక్రియ గడువు పొడగించాలని విజ్ఞప్తి చేశారు. MLA శ్రీ గణేష్, నవీన్ యాదవ్, MLC అద్దంకి దయాకర్, బలమూరి వెంకట్ తదితర కాంగ్రెస్ నేతలు CEOను కలిసి గడువు పొడగించాలని డిమాండ్ చేశారు.

CEO సుదర్శన్ రెడ్డి మాట్లాడుతూ ఓటర్లు తమకు అందిన ఎన్యుమరేషన్ ఫారాలను తక్షణమే పూర్తి చేసి BLO లకు అందజేయాలని కోరారు. ఫారాలు పూరించేటప్పుడు తప్పులు లేకుండా జాగ్రత్తగా నింపి పాస్పోర్ట్ సైజ్ ఫోటో అతికించి సమర్పించాలని సూచించారు. 2002 నాటి ఓటర్ జాబితాలో వివరాలు ఉంటే వాటిని తప్పనిసరిగా నమోదు చేయాలని తెలిపారు.