తిరుపతి ఉపాధ్యాయ నగర్‌లో చిరుతపులి సంచారం; బోన్ల డిమాండ్

తిరుపతిలోని ఉపాధ్యాయ నగర్ (ATV ప్రాంతం) సమీపంలో చిరుతపులి కనిపించి కలకలం రేపింది. ఓ ఇంటి పిట్టగోడపై చిరుత కూర్చొని ఉండడంతో స్థానికులు ఉలిక్కిపడ్డారు. వెంటనే అటవీశాఖ అధికారులకు సమాచారం ఇచ్చారు.

ఘటనాస్థలానికి చేరుకున్న అటవీ సిబ్బంది అరుపులు, టపాసులతో చిరుతను అడవి వైపు తరిమే ప్రయత్నం చేశారు. అధికారులు స్థానికులను అప్రమత్తంగా ఉండాలని, రాత్రి పూట అటవీ ప్రాంతాలకు వెళ్లవద్దని హెచ్చరిస్తున్నారు.

తిరుపతి శివారు ప్రాంతాలు శేషాచలం కొండలకు ఆనుకొని ఉండడంతో తరచూ చిరుతలు జనావాసాల వద్దకు వస్తున్నాయి. గత మూడు నెలలుగా ఇదే సమస్య కొనసాగుతోంది. ఈ ప్రాంతంలో సుమారు 1000-1500 ఇళ్లు ఉండగా, కుక్కలు వంటి పెంపుడు జంతువులపై దాడులు జరిగిన సంఘటనలు ఉన్నాయి.

కేవలం కెమెరాలతో సరిపెట్టకుండా బోన్లు ఏర్పాటు చేసి చిరుతను పట్టుకోవాలని స్థానికులు డిమాండ్ చేశారు. అటవీ శాఖ అధికారులు ఘటనాస్థలంలో పాదముద్రలు పరిశీలిస్తూ, ఇవాళ సాయంత్రానికి బోన్లు ఏర్పాటు చేస్తామని తెలిపారు.