లండన్ సీఏ ఉద్యోగం వదిలి పందుల ఎగుమతి వ్యాపారంలో విజయం సాధించిన తేజ

కృష్ణా జిల్లా నడుపూరుకు చెందిన తేజ చార్టర్డ్ అకౌంటెంట్‌గా చదివి లండన్ లో ఉద్యోగం చేశారు. ఆ తర్వాత ఉద్యోగం వదిలి స్వగ్రామానికి తిరిగి వచ్చి పందుల పెంపకంపై దృష్టి పెట్టారు.

తేజ సొంతంగా అప్పన్న మీట్ వర్క్స్ అనే కంపెనీని ప్రారంభించారు. రెండు ఎకరాల్లో ఆధునిక షెడ్లు నిర్మించి 120 బ్రీడింగ్ పందులు, 1200 ఫ్యాట్నింగ్ పందులను పెంచుతున్నారు. అస్సాం, మేఘాలయ, నాగాలాండ్ వంటి ఈశాన్య రాష్ట్రాల్లో పంది మాంసానికి డిమాండ్ ఉండటంతో ఎగుమతి చేస్తున్నారు.

మొదట్లో ఇతర ప్రాంతాల నుంచి పందులను సేకరించి ఎగుమతి చేసినా, సరఫరా సరిపోలేదు. దీంతో సొంతంగా పెంపకం ప్రారంభించారు. ప్రస్తుతం రైతులకు బ్రీడింగ్ పందులను అందించి, పందులు పెరిగాక వాటిని బై-బ్యాక్ ఒప్పందం ద్వారా కొనుగోలు చేస్తున్నారు. ఒక యూనిట్ (30 ఆడ పందులు + 3 మగ పందులు) ఏర్పాటు చేయడానికి రూ.6-9 లక్షల వరకు ఖర్చవుతుందని, సంవత్సరానికి రూ.4-5 లక్షల ఆదాయం వస్తుందని తేజ తెలిపారు.

గ్రామీణాభివృద్ధి కోసం కేంద్ర ప్రభుత్వం ఎన్ఎల్ఎం స్కీమ్, పీఎంఈజీపీ లోన్ వంటి పథకాలు అందుబాటులో ఉన్నాయి. 10 యూనిట్ల పందుల పెంపకానికి సుమారు రూ.30 లక్షల రుణం వస్తుందని తేజ వివరించారు. ప్రస్తుతం అతని వ్యాపారంలో 16-18 మందికి ఉపాధి లభిస్తోంది. భవిష్యత్తులో 40-100 మంది రైతులను భాగస్వాములుగా చేర్చుకోవాలని లక్ష్యంగా పెట్టుకున్నారు.