మహబూబాబాద్‌లో శిథిలమైన ప్రభుత్వ పాఠశాల; కలెక్టర్‌కు విద్యార్థుల విజ్ఞప్తి

మహబూబాబాద్ జిల్లా చీమలా తండాలోని మండల పరిషత్ ప్రాథమిక పాఠశాల భవనం తీవ్రంగా శిథిలమైంది. తరగతి గదుల్లో పైకప్పు పెచ్చులు ఊడిపడుతుండగా, ఇనుప రాడ్లు బయటికి వచ్చాయి.

ప్రత్యామ్నాయం లేకపోవడంతో ఇదే భవనంలో తరగతులు కొనసాగుతున్నాయి. పైకప్పు నుంచి స్లాబ్ ముక్కలు పడే ప్రమాదం ఉన్నందున తల్లిదండ్రులు ఆందోళన చెందుతున్నారు. విద్యార్థులు నేరుగా జిల్లా కలెక్టర్‌ను కొత్త భవనం నిర్మించాలని వీడియో సందేశం ద్వారా కోరారు. ‘చదువు కావాలి, ప్రాణాలు కూడా కావాల’ని ఒక విద్యార్థి ఆవేదన వ్యక్తం చేశాడు.

స్థానికుల కథనం ప్రకారం, ఈ భవనం గత 20 సంవత్సరాలుగా శిథిలావస్థలో ఉన్నా పలు ప్రభుత్వాలకు చేసిన విన్నపాలు ఫలించలేదు. భయంతో కొందరు తల్లిదండ్రులు తమ పిల్లలను ప్రైవేట్ స్కూళ్లకు పంపుతున్నారు. అధికారులు వెంటనే స్పందించి కొత్త భవనం మంజూరు చేయాలని గ్రామస్తులు కోరుతున్నారు. రాష్ట్ర ముఖ్యమంత్రి, విద్యాశాఖ మంత్రి అయిన రేవంత్ రెడ్డి కూడా దీనిపై దృష్టి పెట్టాలని వారు విజ్ఞప్తి చేస్తున్నారు.