కుటుంబం కోసం ఆటో డ్రైవర్‌గా మారిన మహబూబాబాద్ యువతి సరస్వతి

మహబూబాబాద్ జిల్లా ఎల్బీజీ నగర్‌కు చెందిన బట్టు సరస్వతి కుటుంబ బాధ్యతల కోసం ఆటో డ్రైవర్‌గా మారారు. తల్లి అనారోగ్యంతో వైద్య ఖర్చులు పెరగడంతో ఆమె ఈ నిర్ణయం తీసుకున్నారు.

చిన్నతనంలోనే తండ్రి కుటుంబాన్ని వదిలి వెళ్లిపోయాడని సరస్వతి తెలిపారు. తల్లి భద్రమ్మ ఇద్దరు కుమార్తెలను పెంచి పెద్ద చేశారు. సరస్వతి ఓపెన్ యూనివర్సిటీ ద్వారా ఇంటర్ పూర్తి చేశారు.

తల్లి చికిత్స కోసం ఇంటిని తాకట్టు పెట్టి ఆటో కొనుగోలు చేశారు. ఆటో డ్రైవింగ్ నేర్చుకుని రోడ్లపై ఆటో నడుపుతూ కుటుంబాన్ని పోషిస్తున్నారు. అక్కకు కూడా అండగా ఉంటున్నారు.

తల్లి వైద్య ఖర్చులకు ప్రస్తుతం నెలకు రూ.4,000–5,000 వరకు వెచ్చిస్తున్నట్టు సరస్వతి చెప్పారు. స్థానికులు ఆమె ఆత్మవిశ్వాసాన్ని ప్రశంసిస్తున్నారు.