మహారాష్ట్ర టెట్ పేపర్ లీక్ కేసు: మాస్టర్ మైండ్ విజయేంద్ర గుప్తా బీహార్‌లో అరెస్ట్

మహారాష్ట్ర టెట్ పేపర్ లీక్ కేసులో ప్రధాన నిందితుడు విజయేంద్ర గుప్తా బీహార్‌లో పోలీసులకు చిక్కాడు. అతడితో పాటు మరో సహచరుడిని కూడా పోలీసులు అదుపులోకి తీసుకున్నారు.

ఈ పేపర్ లీక్ సిండికేట్‌కు విజయేంద్ర గుప్తా భార్యతో సంబంధం ఉన్నట్లు పోలీసులు గుర్తించారు. సిండికేట్ ఆర్థిక లావాదేవీలు ఆమె సమక్షంలో జరిగినట్లు నిర్ధారించారు. ఢిల్లీ, పాట్నాలో ఆమె పేరుతో ఆస్తులు కొనుగోలు చేసినట్లు దర్యాప్తు చేస్తున్నారు.

ఇప్పటివరకు ఈ కేసులో 12 మంది నిందితులను అరెస్ట్ చేశారు. విజయేంద్ర గుప్తాకు దేశవ్యాప్తంగా అనేక పరీక్షల పేపర్ లీక్ కేసులతో సంబంధం ఉన్నట్లు పోలీసులు అనుమానిస్తున్నారు. ప్రస్తుతం మహారాష్ట్రకు ట్రాన్సిట్ రిమాండ్ పై గుప్తాను తీసుకువచ్చారు.