హైద్రాబాద్‌లో మక్తా కాలనీ వాసుల నిరసన - హైడ్రా నోటీసులకు వ్యతిరేకంగా ఆందోళన

హైద్రాబాద్ లోని ఖైరతాబాద్ పరిధిలోని ఎంఎస్ మక్తా కాలనీ, బీఎస్‌ మక్తా కాలనీ వాసులు హైడ్రా కూల్చివేత నోటీసులకు వ్యతిరేకంగా నిరసన తెలిపారు. నెక్లెస్ రోడ్ రైల్వే స్టేషన్ సమీపంలో ఆందోళనకు దిగారు.

తమ నివాసాలను కూల్చివేయకూడదని, ప్రభుత్వం ఈ విషయంలో హామీ ఇవ్వాలని డిమాండ్ చేశారు. కాలనీలో కొంతమందికి హైడ్రా అధికారులు నోటీసులు జారీ చేయడంతో, త్వరలోనే అందరికీ నోటీసులు వచ్చే అవకాశం ఉందని, తమ ఇళ్లు కూల్చివేతకు గురవుతాయన్న భయం వ్యక్తం చేశారు.

50 ఏళ్లకు పైగా ఈ కాలనీ ఉనికిలో ఉందని, సుమారు 50,000 మంది ఇక్కడ నివసిస్తున్నారని స్థానికులు తెలిపారు. నిరసనకారులు మాట్లాడుతూ, “డబుల్ బెడ్ రూమ్ ఇండ్లు ఇస్తామని చెప్పి దూర ప్రాంతాలకు పంపిస్తే మేం బతకడం కష్టం. మా జీవనాధారాలన్నీ ఇక్కడే ఉన్నాయి” అని అన్నారు.

స్థానికులు తమకు రక్షణ కల్పించాలని, ఇళ్లను కూల్చివేయకుండా చూడాలని ప్రభుత్వాన్ని కోరారు. ఈ విషయంలో హైడ్రా అధికారులు లేదా ప్రభుత్వం నుండి అధికారిక స్పందన రావాల్సి ఉంది.