మల్లాపూర్ కనక సోమేశ్వరాలయం: అభిషేక జలం 200 మీటర్ల దూరంలో సోమధారగా వస్తుంది

జగిత్యాల జిల్లా కోరుట్ల నియోజకవర్గంలోని మల్లాపూర్ మండల కేంద్రం శివారులో కనక సోమేశ్వర స్వామి ఆలయం ఉంది. ఈ ఆలయం ఎత్తైన ఏకశిల గుట్టపై వెలిసింది. ఇక్కడి స్వయంభూ శివలింగం కింద బంగారు లింగం నిక్షిప్తమై ఉందని భక్తులు విశ్వసిస్తారు. అందుకే స్వామిని కనక సోమేశ్వరుడిగా పిలుస్తున్నారు.

గర్భగుడిలో శివలింగానికి చేసే అభిషేక జలం బయటకు వెళ్లకుండా భూమిలోకి ఇంకుతుంది. ఆ జలం ఆలయానికి దాదాపు 200 మీటర్ల దూరంలో రాతి పొరల నుంచి సోమధార రూపంలో వెలువడుతుంది. ఈ నీటిని భక్తులు పవిత్ర తీర్థంగా భావిస్తారు. కంటికి అద్దుకుంటే చూపు మెరుగవుతుందని స్థానికుల నమ్మకం.

ఆలయంలో పురాతన కోనేరు కూడా ఉంది. ఎండాకాలంలోనూ కోనేటిలో నీళ్లు ఉంటాయని భక్తులు చెబుతారు. ఈ నీటిని పంటలపై చల్లితే చీడపీడలు తగ్గుతాయని, దిగుబడి పెరుగుతుందని స్థానికులు విశ్వసిస్తున్నారు.

స్థానిక చరిత్ర ప్రకారం ఈ ఆలయానికి పురాతన నేపథ్యం ఉంది. ప్రస్తుత గుడిని సుమారు 120 సంవత్సరాల క్రితం నిర్మించినట్లు చరిత్రకారులు నిర్ధారించారు. అంతకంటే ముందే ఇక్కడ శివలింగం ఉన్నట్లు స్థానికులు చెబుతారు.

శ్రావణ మాసం సోమవారాలు, కార్తీక పౌర్ణమి, మహాశివరాత్రి సందర్భాల్లో ఉమ్మడి కరీంనగర్, నిజామాబాద్ జిల్లాల నుంచి వేలాది మంది భక్తులు ఇక్కడికి వస్తారు. భక్తులు గుట్టపై సంప్రదాయ పద్ధతిలో నైవేద్యం సిద్ధం చేస్తారు.