25 ఏళ్ల నాటి అప్పు తీర్చేందుకు 1000 కి.మీ. ప్రయాణించిన వ్యక్తి

తెలంగాణలోని జగిత్యాల జిల్లా ధర్మపురిలో ఒక వినూత్న ఘటన చోటుచేసుకుంది. కేరళ రాష్ట్రం పాలకాడుకు చెందిన మహ్మద్ ఇస్మాయిల్ 25 ఏళ్ల క్రితం తను తీసుకున్న అప్పును తీర్చేందుకు 1000 కిలోమీటర్లు ప్రయాణించి వచ్చాడు.

25 సంవత్సరాల క్రితం సౌదీ అరేబియాలో ఇస్మాయిల్, ధర్మపురికి చెందిన ఎడ్ల లచ్చన్న కలిసి పనిచేశారు. ఆ సమయంలో ఇస్మాయిల్ లచ్చన్న దగ్గర కొంత డబ్బు అప్పు తీసుకున్నాడు. తర్వాత ఇద్దరూ వేర్వేరు ప్రాంతాలకు వెళ్లిపోయారు. లచ్చన్న చిరునామా ఇస్మాయిల్ వద్ద లేదు.

అప్పు తీర్చాలనే సంకల్పంతో ఇస్మాయిల్ 25 ఏళ్ల తర్వాత కేవలం ధర్మపురి అనే పేరు మాత్రమే గుర్తు పెట్టుకుని, గూగుల్ మ్యాప్స్ సాయంతో కేరళ నుంచి ధర్మపురికి వచ్చాడు. స్థానికుల సహాయంతో లచ్చన్న ఇంటి అడ్రస్ కనుగొన్నాడు. ఇంటికి వెళ్లగా లచ్చన్న ప్రస్తుతం గల్ఫ్లో ఉన్నాడని తెలిసింది. దీంతో ఇస్మాయిల్ లచ్చన్న కుటుంబ సభ్యులకు రూ.25,000 ఇచ్చాడు.

ఈ వార్త సోషల్ మీడియాలో షేర్ అవుతుండగా, నెటిజన్లు ఇస్మాయిల్ చర్యను అభినందిస్తున్నారు.