మంగపేట రైల్వే గేటుతో నిత్యం ట్రాఫిక్ ఇబ్బందులు; ఆర్ఓబీ నిర్మాణం డిమాండ్

కరీంనగర్ జిల్లా గంగాధర మండలం మంగపేట వద్ద ఉన్న రైల్వే గేటు వాహనదారులకు ఇబ్బందిగా మారింది. ఇది కొండగట్టు, వేములవాడ, ధర్మపురి వంటి పుణ్యక్షేత్రాలకు వెళ్లే ప్రధాన మార్గం. హైదరాబాద్-జగిత్యాల 563 నంబర్ జాతీయ రహదారిపై ఈ గేటు ఉంది. ప్రతి రోజూ వేలాది వాహనాలు ఈ మార్గం గుండా వెళ్తుంటాయి.

స్థానికుల ప్రకారం ఒకసారి గేటు పడితే 15 నుంచి 20 నిమిషాలు వేచి ఉండాల్సి వస్తుంది. కొన్నిసార్లు అరగంట నుంచి గంట వరకు ట్రాఫిక్ నిలిచిపోతుంది. ఈ మార్గంలో రోజుకు 20 నుంచి 30 రైళ్లు ప్రయాణిస్తున్నాయి. గేటు పడిన ప్రతిసారీ రోడ్డుపై వాహనాల వరుస పెరుగుతోంది.

జగిత్యాల, నిజామాబాద్ నుంచి కరీంనగర్, హైదరాబాద్ వైపు వెళ్లే అంబులెన్సులు కూడా ఇక్కడ ఆగాల్సి వస్తోంది. రోజుకు సుమారు 30 నుంచి 40 అంబులెన్సులు ఈ గేటు దాటుతున్నట్లు స్థానికులు చెబుతున్నారు. అత్యవసర రోగులకు సకాలంలో చికిత్స అందడం కష్టమవుతోందని వారు ఆందోళన వ్యక్తం చేస్తున్నారు.

రైల్వే ఓవర్ బ్రిడ్జి లేకపోవడమే ప్రధాన సమస్య అని వాహనదారులు అంటున్నారు. రైల్వే గేటు వద్ద రోడ్డు గుంతలతో నిండి ఉంది. వర్షాకాలంలో రోడ్డు పరిస్థితి మరింత దిగజారుతుందని స్థానికులు చెబుతున్నారు. స్కూల్ వాహనాలు, ఉద్యోగులు సమయానికి చేరుకోలేకపోతున్నారు.

కరీంనగర్-జగిత్యాల నాలుగు వరుసల రహదారిని కేంద్రం ఇటీవల మంజూరు చేసింది. రోడ్డు నిర్మాణం కంటే ముందు రైల్వే ఓవర్ బ్రిడ్జి నిర్మించాలని స్థానికులు కోరుతున్నారు. ప్రజాప్రతినిధులకు ఎన్నోసార్లు విన్నవించినా పరిష్కారం కాలేదని వాహనదారులు చెబుతున్నారు.