మంత్రాలయంలో భక్తుల ట్రాఫిక్ కష్టాలు; మెరుగైన వ్యవస్థ డిమాండ్

మంత్రాలయం శ్రీ రాఘవేంద్ర స్వామి ఆలయంలో సెలవు రోజుల్లో భక్తుల రద్దీ విపరీతంగా పెరుగుతోంది. రోజూ వేలాది మంది, సెలవుల్లో లక్షలాది మంది భక్తులు తెలుగు రాష్ట్రాలు, కర్ణాటక, మహారాష్ట్ర నుంచి వస్తుంటారు. కానీ ఈ రద్దీకి అనుగుణంగా ట్రాఫిక్, పార్కింగ్ సౌకర్యాలు లేవు.

పట్టణంలో రోడ్లు ఇరుకుగా ఉండటం, ప్రత్యేక పార్కింగ్ స్థలాలు లేకపోవడంతో వాహనాలు రోడ్లపైనే ఆగిపోతున్నాయి. ఆటోలు అడ్డదిడ్డంగా తిరగడం, బైపాస్ రోడ్డు లేకపోవడం వల్ల ట్రాఫిక్ జామ్లు తీవ్రమవుతున్నాయి. మంత్రాలయానికి చేరుకోవడానికి గంటల కొద్దీ సమయం పడుతుందని భక్తులు ఆవేదన వ్యక్తం చేస్తున్నారు.

ఒకవైపు టోల్ రుసుం వసూలు చేస్తున్నా పార్కింగ్ వంటి కనీస సౌకర్యాలు కల్పించడం లేదని భక్తులు విమర్శిస్తున్నారు. అధికారులు, మఠం నిర్వాహకులు సమన్వయంతో వ్యవహరించకపోవడంతో సమస్య మరింత పెచ్చుమీరింది. వాహనాల సంఖ్యకు తగ్గట్టు ట్రాఫిక్ ప్రణాళిక రూపొందించాలని, శాశ్వత పరిష్కారం చూపాలని భక్తులు డిమాండ్ చేస్తున్నారు.