ఉజ్జయినీ మహంకాళి రంగంలో మాతంగి స్వర్ణలత భవిష్యవాణి: విగ్రహ ప్రతిష్టకు ఆర్నెల్ల గడువు

సికింద్రాబాద్ లోని ఉజ్జయినీ మహంకాళి అమ్మవారి బోనాల జాతరలో ఈ రోజు ఉదయం రంగం కార్యక్రమం నిర్వహించారు. మాతంగి స్వర్ణలత పూనకంలో అమ్మవారి భవిష్యవాణి చెప్పారు.

ఆ సమయంలో ఆమె మాట్లాడుతూ, విగ్రహ ప్రతిష్టాపన ఏడాదిలోపు చేస్తామని మాటిచ్చి తప్పడంతో అమ్మవారు ఆగ్రహించినట్లు చెప్పారు. ఆరు నెలల్లో విగ్రహాన్ని ప్రతిష్టించాలని, లేకుంటే ప్రాణ నష్టం జరుగుతుందని హెచ్చరించినట్లు తెలిపారు. విగ్రహ ప్రతిష్ట చేస్తే భక్తుల కోరికలు నెరవేరుతాయని, "కోరిందల్లా కొంగు బంగారం చేస్తానని" అమ్మవారు చెప్పినట్లు ఆమె తెలిపారు.

ఈ విషయంపై రాష్ట్ర మంత్రి పొన్నం ప్రభాకర్ స్పందించారు. అమ్మవారి విగ్రహ ఏర్పాటుకు ప్రభుత్వం ఒక కమిటీని నియమిస్తుందని, ఆ కమిటీ ఇచ్చే నివేదిక ఆధారంగా చర్యలు తీసుకుంటామని తెలిపారు. ప్రభుత్వం నుంచి ఎవరూ విగ్రహ ప్రతిష్టాపనను అడ్డుకోవడం లేదని ఆయన స్పష్టం చేశారు.

ఇది ప్రతి సంవత్సరం జరిగే సంప్రదాయ కార్యక్రమం. బోనాల జాతరలో రంగం కార్యక్రమంలో ఆదిశక్తి స్వరూపమైన మాతంగి భవిష్యవాణి చెబుతారు.