మేడిపల్లి బంగారు చోరీ కేసు ఛేదన: బీహార్ గ్యాంగ్ అరెస్టు, ₹14 లక్షల నగదు రికవరీ

హైదరాబాద్ మేడిపల్లిలోని క్యారెట్ లైన్‌లో ఉన్న డిమాండ్ గోల్డ్ జ్యువెలరీ షాప్‌లో ఈ నెల 4న జరిగిన ₹45 లక్షల బంగారు చోరీ కేసును పోలీసులు ఛేదించారు. ఈ చోరీకి పాల్పడిన బీహార్‌కు చెందిన చెద్దర్ గ్యాంగ్‌ను అరెస్టు చేసినట్లు మల్కాజగిరి సీపీ సుమతి తెలిపారు.

దొంగలు కేవలం ఆరు నిమిషాల్లోనే షాపులోని ₹45 లక్షల విలువైన బంగారు ఆభరణాలను దోచుకున్నారు. షాపులోని అలారం ఐదు నిమిషాల పాటు మాత్రమే మోగుతుందని వారు ముందే తెలుసుకున్నారు. ఆ లెక్కతో పక్కా స్కెచ్ వేసి చోరీకి పాల్పడినట్లు దర్యాప్తులో తేలిందని పోలీసులు చెప్పారు.

నిందితుల కోసం నాలుగు ప్రత్యేక బృందాలు ఇతర రాష్ట్రాల్లో గాలింపు చేపట్టాయి. ఆ బృందాలే నిందితులను పట్టుకున్నట్లు సీపీ సుమతి తెలిపారు.

ఈ కేసులో ఇప్పటివరకు ₹14 లక్షల నగదును రికవరీ చేసినట్లు పోలీసులు తెలిపారు.