తెలంగాణ కాంగ్రెస్ పనితీరుపై మీనాక్షి నటరాజన్ హైకమాండ్‌కు నివేదిక: కథనాలు

AICC తెలంగాణ వ్యవహారాల ఇన్ఛార్జి మీనాక్షి నటరాజన్ పార్టీ అధిష్టానానికి ఓ నివేదిక సమర్పించినట్టు కథనాలు వెలువడ్డాయి. దీన్ని ఇప్పుడు వివిధ మీడియా సంస్థలు తమ కథనాల్లో పేర్కొంటున్నాయి.

నివేదికలో తెలంగాణ కాంగ్రెస్ ప్రభుత్వ పాలనపై అనేక అంశాలు ప్రస్తావించినట్టు అనధికారిక సమాచారం. మంత్రులపై అవినీతి ఆరోపణలు, అధికారుల జులుం, ప్రజల్లో పెరుగుతున్న అసంతృప్తి వంటి అంశాలను మీనాక్షి నటరాజన్ హైలైట్ చేసినట్టు తెలుస్తోంది.

అంతేగాక, ముఖ్యమంత్రి రేవంత్ రెడ్డితో పాటు ఇద్దరు మంత్రులు మాత్రమే రాష్ట్రంలో సర్వాధికారులుగా చలాయిస్తున్నారని, మిగిలిన మంత్రులు నామమాత్రంగా మిగిలిపోయారన్న అభిప్రాయాన్ని నివేదికలో వ్యక్తం చేసినట్టు కథనాలు చెబుతున్నాయి. BJPతో రేవంత్ రెడ్డి సాన్నిహిత్యం పార్టీ శ్రేణులను గందరగోళానికి గురిచేస్తుందని, మైనారిటీ ఓటు బ్యాంకు దూరమయ్యే ప్రమాదం ఉందని కూడా ఆ నివేదిక హెచ్చరించినట్టు సమాచారం.

బండి భగీరథ కేసులో హోమ్ మంత్రిగా రేవంత్ రెడ్డి వ్యవహరించిన తీరుపై ప్రజలు ఆగ్రహంగా ఉన్నారన్న అంశం కూడా నివేదికలో ఉన్నట్టు కొన్ని వర్గాలు పేర్కొంటున్నాయి. ఇప్పటికిప్పుడు ఎన్నికలు జరిగితే కాంగ్రెస్ అధికారంలోకి రావడం కల మాత్రమే అనే అభిప్రాయాన్ని నివేదిక వ్యక్తం చేసినట్టు చెప్పబడుతోంది. అయితే, ఈ నివేదిక వాస్తవమేనా, దానిలోని కంటెంట్ ఏమిటనేది ధృవీకరించబడలేదు. కాంగ్రెస్ పార్టీ లేదా ప్రభుత్వం నుంచి అధికారిక స్పందన ఇంకా రాలేదు.