ప్రభుత్వ పాఠశాలల్లో మెగా పీటీఎంలో విద్యార్థులదే కీలక పాత్ర; సీఎం చంద్రబాబు, లోకేశ్ హాజరు

గురువారం ఆంధ్రప్రదేశ్ వ్యాప్తంగా ప్రభుత్వ పాఠశాలలు, జూనియర్ కళాశాలల్లో మెగా పేరెంట్స్-టీచర్స్ మీటింగ్ (పీటీఎం) నిర్వహించారు. ఈ సభల్లో విద్యార్థులు స్వయంగా వ్యాఖ్యాతలు, నిర్వాహకులుగా ముందుండి నడిపించడం విశేషం.

రంపచోడవరంలోని ఒక ప్రభుత్వ పాఠశాలలో జరిగిన కార్యక్రమంలో ముఖ్యమంత్రి చంద్రబాబు నాయుడు, మంత్రి నారా లోకేశ్ పాల్గొన్నారు. విద్యార్థులు తల్లిదండ్రులను గేటు వద్ద స్వాగతం పలకడం, పాఠశాల ప్రగతి వివరాలు చెప్పడం, సాంస్కృతిక ప్రదర్శనలు ఇవ్వడం చేశారు. అంతేకాకుండా తమ తల్లిదండ్రుల పాదాలపై పూలు చల్లి నమస్కరించి ఆశీర్వాదం తీసుకున్నారు.

ఈ సందర్భంగా ఒక విద్యార్థి తాను ఐఏఎస్ అధికారి అయి, ముఖ్యమంత్రి వద్ద కలెక్టర్‌గా రిపోర్ట్ చేయాలన్న ఆశయాన్ని వ్యక్తం చేశారు. సీఎం చంద్రబాబు నాయుడు స్పందిస్తూ, ఆ విద్యార్థి ప్రదర్శించిన కమిట్మెంట్ అసాధారణమని, అందరూ చప్పట్లు కొట్టి ప్రోత్సహించాలని కోరారు. విద్యార్థులతో ముచ్చటించి, క్విజ్ తరహా పోటీలు నిర్వహించారు.

విద్యార్థుల పాదాభివందనం చూసి పలువురు తల్లిదండ్రులు భావోద్వేగానికి గురయ్యారు. ఓ తల్లి తన తల్లి చనిపోయిన సంగతి గుర్తొచ్చి కంట తడి పెట్టినట్లు తెలిపారు. అనంతరం సీఎం, తల్లిదండ్రులతో ప్రతిజ్ఞ చేయించారు. పిల్లలను క్రమం తప్పకుండా పాఠశాలకు పంపడం, వారి విద్యా ప్రమాణాలు పెంచడంలో సహకరించడం, స్వర్ణాంధ్ర 2047 విజన్‌కు సహకారం అందించడం వంటి అంశాలు ఇందులో ఉన్నాయి.