నెహ్రూ మార్కెట్ అగ్నిప్రమాదం: ₹300 కోట్ల నష్టం అంచనా, వ్యాపారులకు సాయం కోరిన మెహబూబా ముఫ్తీ

జమ్మూ నెహ్రూ మార్కెట్‌లో దీపావళి రోజున చోటుచేసుకున్న భారీ అగ్నిప్రమాదంపై PDP అధినేత్రి, మాజీ ముఖ్యమంత్రి మెహబూబా ముఫ్తీ స్పందించారు. ఈ ఘటనలో కనీసం ₹300 కోట్ల నష్టం జరిగి ఉంటుందని ఆమె అంచనా వేశారు. బాధిత వ్యాపారులను ఆదుకునేందుకు కేంద్ర ప్రభుత్వం, జమ్మూ కాశ్మీర్ ప్రభుత్వం కలిసి ప్రత్యేక ఆర్థిక ప్యాకేజీ ప్రకటించాలని ఆమె డిమాండ్ చేశారు.

జమ్మూలోని ప్రధాన వాణిజ్య కేంద్రమైన నెహ్రూ మార్కెట్‌లోని వేర్‌హౌస్‌కు దీపావళి రోజున మంటలు అంటుకున్నాయి. అదే రోజు రాత్రి పటాకుల వల్ల, మరికొన్ని కారణాల వల్ల జమ్మూలో పలుచోట్ల అగ్నిప్రమాదాలు సంభవించాయి. వాటిలో ఈ వేర్‌హౌస్ ప్రమాదమే అతిపెద్దదని మెహబూబా ముఫ్తీ చెప్పారు.

ఈ ఘటనపై ఆమె మాట్లాడుతూ, బాధితులు ఆకాశం నుంచి నేలకు దిగొచ్చిన పరిస్థితి ఎదుర్కొంటున్నారని అన్నారు. ఒక్కో దుకాణంలో 10 నుంచి 12 మంది కూలీలు పనిచేస్తుంటారని, వారు కూడా ఉపాధి కోల్పోయారని ఆమె తెలిపారు. చాలామంది అప్పులు తీసుకుని, ఇంట్లో నగలు అమ్మి వ్యాపారం ప్రారంభించిన వారే ఉన్నారన్నారు. వారిలో అందరికీ బీమా ఉండదని, బీమా ఉన్నా ఇంత పెద్ద నష్టాన్ని పూరించడం సాధ్యం కాదని ఆమె పేర్కొన్నారు.

అగ్నిమాపక సిబ్బంది ఆలస్యంగా చేరుకున్నారని, చిన్న వాహనాలతో వచ్చారని, పైపుల్లో ఒత్తిడి సరిపోలేదని వ్యాపారులు తమకు తెలిపినట్టు మెహబూబా ముఫ్తీ చెప్పారు. ఈ ఆలస్యానికి కారణం ఏంటని దర్యాప్తు జరపాలని ఆమె కోరారు. రద్దీగా ఉండే మార్కెట్లలో అగ్నిప్రమాదాలకు ముందస్తు సన్నాహాలు తప్పనిసరి అని ఆమె అన్నారు.

గతంలో శివ్ మార్కెట్‌లో సంభవించిన అగ్నిప్రమాద బాధితులకు కూడా ఇప్పటివరకు ప్రభుత్వం నుంచి సాయం అందలేదని, వారు ఇంకా ఎదురుచూస్తున్నారని మెహబూబా ముఫ్తీ తెలిపారు. రాజకీయాలు పక్కన పెట్టి బాధితులకు పూర్తి సాయం అందించాలని, వారి వ్యాపారాలు త్వరగా పునరుద్ధరించేలా చర్యలు తీసుకోవాలని ఆమె ప్రభుత్వాన్ని కోరారు.