మెటా ‘మ్యూజ్’ AI సాధనాన్ని నిలిపివేసింది: ఇన్‌స్టాగ్రామ్ గోప్యత వివాదం నేపథ్యంలో నిర్ణయం

మెటా తన వివాదాస్పద AI ఇమేజ్ జనరేషన్ సాధనం ‘మ్యూజ్’ను వెనక్కి తీసుకుంది. ఇన్‌స్టాగ్రామ్‌లో పబ్లిక్‌గా ఉన్న ఫొటోలను యూజర్ల అనుమతి లేకుండా ఈ సాధనం వాడటంతో ప్రపంచవ్యాప్తంగా తీవ్ర గోప్యతా ఉల్లంఘన విమర్శలు వచ్చాయి. భారత్‌లో ఇన్‌స్టాగ్రామ్‌కు 50 కోట్ల మంది వినియోగదారులు ఉన్న నేపథ్యంలో ఈ వివాదం మరింత పెద్ద దుమారం రేపింది.

కౌంటర్‌పాయింట్ రీసెర్చ్ వైస్ ప్రెసిడెంట్ నీల్ షా స్పందిస్తూ, “మెటా తన ప్లాట్‌ఫాంలో యూజర్లను నిలుపుకోవడానికి ఈ ఫీచర్ తీసుకొచ్చింది. కానీ దీన్ని నియంత్రితంగా రోల్ అవుట్ చేయాల్సిన అవసరం ఉంది. పబ్లిక్‌గా ఉన్న కంటెంట్ అయినా AI టూల్స్‌తో మార్ఫింగ్ చేయడానికి యూజర్ సమ్మతి తప్పనిసరి” అని వివరించారు. పబ్లిక్ డేటాను AI టూల్స్ ఎలా వాడాలనే దానిపై ప్రభుత్వాలు సరికొత్త నిబంధనలు రూపొందించాల్సిన అవసరం ఉందని ఆయన హెచ్చరించారు.

మాజీ పాలసీ సలహాదారు సుబిమల్ భట్టాచార్య మాట్లాడుతూ, “ఇది ఇటీవలి చరిత్రలో అతి పెద్ద గోప్యతా ఉల్లంఘనల్లో ఒకటి. నమ్మకమైన కంపెనీ అయిన మెటానే ఇలా చేయడం ఆందోళన కలిగిస్తోంది. ఐటీ చట్టం, ఐటీ నిబంధనల అమలును కఠినతరం చేసి జరిమానాలు విధించాలి. లేకపోతే ఈ ధోరణి ఆగదు” అని అన్నారు.

AI రేసులో భాగంగా కంపెనీలు వేగంగా ఫీచర్లు విడుదల చేస్తున్నాయని, కానీ వాటి ప్రభావాన్ని పట్టించుకోవడం లేదని నిపుణులు అభిప్రాయపడ్డారు. యూజర్లకు స్పష్టమైన ఆప్ట్-ఇన్ ప్రక్రియ, డేటా వినియోగంపై పారదర్శకత, ప్రభుత్వ స్థాయిలో బలమైన నియంత్రణ తక్షణమే అవసరమని వారు సూచించారు. సిగరెట్ ప్యాకెట్లపై హెచ్చరికలాగే సోషల్ మీడియా ప్లాట్‌ఫాంలు కూడా డేటా వాడకం వల్ల కలిగే నష్టాలను ముందుగానే యూజర్లకు స్పష్టంగా తెలియజేయాలని నీల్ షా వివరించారు.