చికెన్, కోడిగుడ్ల ధరలు భారీగా పెరిగాయి; వినియోగదారులపై భారం

తెలుగు రాష్ట్రాల్లో చికెన్, కోడిగుడ్ల ధరలు ఒక వారంలోనే భారీగా పెరిగాయి. కిలో స్కిన్లెస్ చికెన్ ధర ₹340 వరకు చేరగా, కోడిగుడ్డు ధర ₹8.50కి పెరిగింది. గతంలో స్కిన్లెస్ చికెన్ కిలో ₹250 లోపు ఉండేది. కోడిగుడ్డు ₹6-7కి లభించేది.

ధరలు పెరగడంతో వినియోగదారులు మునుపటిలా కిలో కొనలేక అరకిలో మాత్రమే కొంటున్నారు. వారంలో రెండుసార్లు చికెన్ తినేవారు ఇప్పుడు నెలకొకసారికే పరిమితమవుతున్నారు. గుడ్ల వినియోగం కూడా తగ్గింది.

చికెన్ దుకాణదారుల ప్రకారం ధరలు పెరిగిన తర్వాత అమ్మకాలు 30% వరకు తగ్గాయి. హోటళ్లు, మెస్లలో బిర్యానీ, చికెన్ కర్రీ ఆర్డర్లు సగానికి పడిపోయాయని యజమానులు చెబుతున్నారు. ఫంక్షన్లలో కూడా ఖర్చు పెరగడంతో నిర్వాహకులు ప్రత్యామ్నాయాలు చూస్తున్నారు.

వేసవి కాలం వల్ల కోళ్ల గుడ్ల ఉత్పత్తి తగ్గడం, ముడిసరుకు ధరలు, రవాణా ఖర్చులు పెరగడం ధరల పెరుగుదలకు ప్రధాన కారణాలని వ్యాపారులు తెలిపారు. మరో నెలన్నర వరకు ధరలు ఇదే స్థాయిలో కొనసాగవచ్చని అంచనా.