ఆపరేషన్ సింధూర్ భారత సైనిక సామర్థ్యాన్ని నిరూపించింది: రాజ్‌నాథ్ సింగ్

కేంద్ర రక్షణ మంత్రి రాజ్‌నాథ్ సింగ్ ఒక యుద్ధనౌక ప్రారంభోత్సవంలో పాల్గొని ప్రసంగించారు. ఆ సందర్భంగా ఆయన ఆపరేషన్ సింధూర్ గురించి మాట్లాడారు.

ఈ ఆపరేషన్ భారత సాయుధ బలగాలు తమను తాము రక్షించుకోవడమే కాకుండా, అవసరమైతే శత్రువులపై నిర్ణయాత్మక దాడి చేయగల సామర్థ్యాన్ని ప్రదర్శించిందని ఆయన పేర్కొన్నారు. సైన్యం సమూలంగా శత్రువులను నాశనం చేయగలదని స్పష్టం చేశారు.

ఈ సందర్భంగా సముద్ర భద్రత, ఆర్థిక భద్రతల మధ్య సంబంధాన్ని కూడా రక్షణ మంత్రి వివరించారు. సముద్ర మార్గాలు భారత వాణిజ్యం, ఇంధన సరఫరా, ఆర్థిక అభివృద్ధికి ప్రాణ రేఖలని అన్నారు. ప్రపంచం దృష్టి ఇప్పుడు ఇండో-పసిఫిక్ ప్రాంతంపై ఉందని, ఈ ప్రాంతంలో భారత్ నమ్మకమైన భాగస్వామిగా, నికర భద్రతా ప్రదాతగా (net security provider) అవతరించిందని చెప్పారు.

ప్రధాని నరేంద్ర మోడీ విజన్ ప్రకారం, సముద్రాలపై సహకారం ద్వారా ప్రాంతీయ భద్రత, వృద్ధిని సాధించాలన్నది భారత ఆకాంక్ష అని తెలిపారు. కార్యక్రమంలో భాగంగా భారత నౌకా దళంలో కొత్తగా ఒక యుద్ధనౌక చేరింది.