మెక్సికోలో 7.4 తీవ్రతతో భూకంపం; సునామీ హెచ్చరిక

మెక్సికోలో 7.4 తీవ్రతతో భూకంపం సంభవించింది. చియాపాస్ రాష్ట్రంలోని ప్యూర్టో మడెరో తీర ప్రాంతంలో ఈ భూకంపం కేంద్రీకృతమైంది. అమెరికా జియోలాజికల్ సర్వే ప్రకారం, భూ ఉపరితలం నుంచి 10 కిలోమీటర్ల లోతులో ఇది సంభవించింది.

ఈ నేపథ్యంలో మెక్సికో తీరంలో సునామీ ముందస్తు హెచ్చరికలు జారీ చేశారు. భూకంప కేంద్రానికి 300 కిలోమీటర్ల పరిధిలో భారీ అలలు వచ్చే అవకాశం ఉందని అమెరికా సునామీ హెచ్చరికల కేంద్రం హెచ్చరించింది.

భూకంప ప్రభావం పొరుగున ఉన్న గ్వాటమాల, ఎల్ సాల్వడార్ దేశాల్లోనూ కనిపించింది. మెక్సికో దక్షిణ సరిహద్దు నగరం టపాచులాలో తొలుత స్వల్పంగా ప్రారంభమైన ప్రకంపనలు తీవ్రమయ్యాయి. మెక్సికో సిటీలో భవనాలు ఊగిపోవడంతో ప్రజలు భయంతో బయటకు పరుగులు తీశారు. గ్వాటమాల సిటీలోనూ ఇదే పరిస్థితి ఏర్పడింది.

మెక్సికో సిటీలో భూకంప హెచ్చరిక వ్యవస్థ మోగలేదు. ప్రారంభంలో భూకంప తీవ్రత నిర్దేశిత పరిమితిని మించకపోవడంతో అలర్ట్ సిస్టం సక్రియం కాలేదని ప్రభుత్వం వివరించింది. ప్రస్తుతానికి పెద్ద నష్టం నివేదికలు లేవు. సునామీ ముప్పు ఉన్నందున తీర ప్రాంతవాసులు అప్రమత్తంగా ఉండాలని అధికారులు సూచించారు.