విజయవాడ రౌడీషీటర్ సాయి కృష్ణ మిస్సింగ్‌: ఈ నెల 29న హాజరు పర్చాలని హైకోర్టు ఆదేశం

విజయవాడకు చెందిన రౌడీషీటర్ సాయి కృష్ణ మిస్సింగ్ కేసుపై హైకోర్టులో విచారణ జరిగింది. ఈ నెల 29న అతన్ని కోర్టు ముందు హాజరు పరచాలని న్యాయస్థానం ఆదేశించింది. సాయి కృష్ణ జాడ కోసం ప్రత్యేక బృందాలను ఏర్పాటు చేయాలని సూచించింది. తదుపరి విచారణను వాయిదా వేసింది.

కృష్ణలంకకు చెందిన సాయి కృష్ణ గత నెల 10వ తేదీ నుంచి కనిపించకుండా పోయాడు. అతనిపై నాన్‌బెయిలబుల్ వారెంట్లు ఉన్నాయి. కనిపించకుండా పోవడంతో కుటుంబ సభ్యులు కోర్టును ఆశ్రయించారు.

కృష్ణలంక పోలీసులు మే 10న మార్కాపురంలో సాయి కృష్ణను తీసుకెళ్లి ఎన్‌కౌంటర్ చేశారని కుటుంబ సభ్యులు ఆరోపిస్తున్నారు. ఓ కుటుంబ సభ్యుడు కోర్టుకు ఇచ్చిన వాంగ్మూలంలో, ఆ రోజు ఇద్దరు కానిస్టేబుళ్లు ఇంటికి వచ్చి ఫోన్ తీసుకుని సీఐ నాగరాజు వద్దకు తీసుకెళ్లారని, సీఐ ‘నీ కొడుకు చనిపోయాడు, ఆశ వదులుకో’ అని బెదిరించారని తెలిపారు. ఈ విషయంపై పోలీసుల స్పందన తెలియాల్సి ఉంది.

హైకోర్టు ఆదేశాలతో 29వ తేదీలోపు సాయి కృష్ణను ప్రభుత్వం కోర్టు ముందు హాజరు పర్చాల్సి ఉంటుంది. ఆ తర్వాత తదుపరి విచారణ జరగనుంది.