తెలంగాణలో భిన్న వాతావరణం: కొన్ని జిల్లాల్లో వర్షాలు, మరికొన్ని జిల్లాల్లో వడగాలుల హెచ్చరిక

తెలంగాణలో భిన్న వాతావరణ పరిస్థితులు కొనసాగుతున్నాయి. కొన్ని జిల్లాల్లో భారీ వర్షాలు కురుస్తుండగా, మరికొన్ని జిల్లాల్లో వడగాలులు వీచే ప్రమాదం ఉందని వాతావరణ శాఖ హెచ్చరించింది.

ఖమ్మం జిల్లా కల్లూరులో అత్యధికంగా 11.1 సెం.మీ వర్షపాతం నమోదైంది. మంచిర్యాల జిల్లా దండేపల్లిలో అత్యధిక ఉష్ణోగ్రత 42.9 డిగ్రీల సెల్సియస్ నమోదైంది. 21 జిల్లాల్లో 42.2 నుంచి 42.8 డిగ్రీల మధ్య, నాలుగు జిల్లాల్లో 41 నుంచి 41.8 డిగ్రీల మధ్య ఉష్ణోగ్రతలు నమోదయ్యాయి.

బంగాళాఖాతంలో ఉపరితల ఆవర్తనం, అరేబియా సముద్రం నుంచి బంగాళాఖాతం వరకు ఒక ద్రోణి కొనసాగుతున్నట్లు వాతావరణ శాఖ తెలిపింది. ఆ ప్రభావంతో రాష్ట్రంలోని పలు చోట్ల భారీ వర్షాలు కురిశాయి. నైరుతి ఋతుపవనాలు చురుగ్గా కదులుతున్నాయని, రెండు రోజుల్లో రాష్ట్రమంతటా విస్తరిస్తాయని కూడా తెలిపింది.

శుక్ర, శని, ఆదివారాల్లో ఆదిలాబాద్, కొమరంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, కరీంనగర్, పెద్దపల్లి జిల్లాల్లో అక్కడక్కడ వడగాలులు వీచే అవకాశం ఉందని IMD హెచ్చరించింది.