ఎల్‌నినో ప్రభావంపై కేంద్ర క్యాబినెట్‌లో చర్చ, రెండు హైవే ప్రాజెక్టులకు ఆమోదం

ప్రధాని నరేంద్ర మోదీ అధ్యక్షతన జరిగిన కేంద్ర క్యాబినెట్ సమావేశంలో దేశంలో ఎల్‌నినో ప్రభావం, వర్షాభావ పరిస్థితులపై చర్చించారు.

ప్రధాని మోదీ రాష్ట్రాలతో సమన్వయం చేసుకోవాలని కేంద్ర మంత్రులకు సూచించారు. ఎల్‌నినో ప్రభావాన్ని ఎదుర్కొనేందుకు ముందస్తు చర్యలు తీసుకోవాలని అన్నారు. యూరప్‌లో వడగాలుల తీవ్రతతో 1100 మందికి పైగా మరణించిన విషయాన్ని ప్రస్తావించారు. ఎల్‌నినో కారణంగా హైడ్రో పవర్ ఉత్పత్తిపై తీవ్ర ప్రభావం పడవచ్చని హెచ్చరించారు.

ఈ సమావేశంలో రెండు జాతీయ రహదారుల ప్రాజెక్టులకు క్యాబినెట్ ఆమోదం లభించింది. ఢిల్లీలో 6 లేన్ల ద్వారకా సొరంగం నిర్మాణానికి రూ.6,970 కోట్లు మంజూరు చేశారు. ఈ సొరంగం 8 కిలోమీటర్ల పొడవు ఉంటుంది. ఉత్తరప్రదేశ్‌లో కాన్పూర్ నుంచి కబ్రాయి వరకు 4 లేన్ల యాక్సెస్ కంట్రోల్డ్ హైవే నిర్మాణానికి కూడా ఆమోదం ఇచ్చారు.

కేంద్ర వ్యవసాయ శాఖ 10 నుంచి 12 రాష్ట్రాలను హై అలర్ట్‌లో ఉంచింది. ఎల్‌నినో ముప్పు ఎక్కువగా ఉన్న 100కు పైగా జిల్లాలను గుర్తించారు. ఆయా ప్రాంతాల రైతులు ప్రత్యామ్నాయ వ్యవసాయ పద్ధతులు అనుసరించాలని ఆదేశించారు.

2047 నాటికి వికసిత్ భారత్ లక్ష్యంగా మౌలిక వసతుల కల్పనకు పెద్దపీట వేయాలని ప్రధాని సూచించారని కేంద్ర మంత్రి అశ్విని వైష్ణవ్ తెలిపారు.