భువనేశ్వర్‌లో ఇండిగో విమానం రద్దు.. లగేజీ బెల్ట్ పై ఎక్కి మహిళ నిరసన

భువనేశ్వర్ విమానాశ్రయంలో ఇండిగో విమానం రద్దు కావడంతో ఓ మహిళా ప్రయాణికురాలు లగేజీ బెల్ట్ పైకి ఎక్కి నిరసన తెలిపారు. ఈ ఘటనకు సంబంధించిన వీడియో సోషల్ మీడియాలో వైరల్ అయింది.

షెడ్యూల్ ప్రకారం గురువారం మధ్యాహ్నం 2:35 గంటలకు ఇండిగో విమానం భువనేశ్వర్ నుంచి ఢిల్లీకి బయలుదేరాల్సి ఉంది. ప్రయాణికులు గంటల పాటు విమానాశ్రయంలో ఎదురుచూశారు. ఎయిర్‌లైన్స్ నుంచి ఎలాంటి సమాచారం అందలేదు.

సాయంత్రం 5:30 గంటలకు విమానం రద్దయినట్లు ఎయిర్‌లైన్స్ ప్రకటించింది. ప్రత్యామ్నాయ ఏర్పాట్లు చేయకపోవడంతో ఓ ప్రయాణికురాలు లగేజీ బెల్ట్ పైకి ఎక్కారు. ఆమె విమానాశ్రయ సిబ్బందితో వాగ్వాదానికి దిగారు. సిబ్బంది వద్ద ఉన్న ఫైళ్లను విసిరేసినట్లు వీడియోలో కనిపించింది.

అనారోగ్యంతో ఉన్న తన బిడ్డ దగ్గరకు వెళ్తున్నానని ఆమె తెలిపారు. తనకు ప్రత్యామ్నాయ ఏర్పాట్లు చేయాలని పట్టుబట్టారు. అనంతరం CISF సిబ్బంది జోక్యం చేసుకొని ఆమెను శాంతింపజేశారు. దీంతో ఆమె అక్కడి నుంచి వెనుదిరిగారు.