ప్రధాని మోదీ జీ7 పర్యటన; స్లోవేకియా అత్యున్నత పౌర పురస్కారం, ఫ్రాన్స్‌తో ఏఐ ఒప్పందం

ప్రధాని నరేంద్ర మోదీ బహుళ ప్రయోజనాత్మక విదేశీ పర్యటన ముగిసింది. స్లోవేకియా గణరాజ్యం ఆయనకు అత్యున్నత పౌర పురస్కారం ‘ఆర్డర్ ఆఫ్ ది వైట్ డబుల్ క్రాస్’ ప్రదానం చేయడంతో, మోదీ ఇప్పటివరకు 33 అంతర్జాతీయ గౌరవాలు అందుకున్న నేతగా నిలిచారు. భారత ప్రధాని స్లోవేకియాలో పర్యటించడం ఇదే తొలిసారి. ఫ్రాన్స్ లో జరిగిన జీ7 శిఖరాగ్ర సదస్సులో ఆహ్వానిత దేశంగా భారత్ పాల్గొని, అంతర్జాతీయ వాణిజ్యం, కనెక్టివిటీ వేగవంతం చేసేందుకు ‘ఇంపాక్ట్’ అనే కొత్త ప్రతిపాదనను తీసుకొచ్చింది. ఈ ప్రతిపాదనపై సభ్య దేశాలన్నీ సానుకూలంగా స్పందించాయి. ఫ్రాన్స్ తో ఆర్టిఫిషియల్ ఇంటెలిజెన్స్ (AI), డేటా రక్షణపై ద్వైపాక్షిక ఒప్పందం కుదిరింది. దీంతో ప్రపంచ AI రంగంలో యూరప్‌తో కలిసి భారత్ కొత్త శక్తిగా ఎదిగే అవకాశం ఏర్పడింది. కెనడాతో దెబ్బతిన్న సంబంధాలు ఇప్పుడు సానుకూల మలుపు తిరిగాయి. కెనడా ప్రధాని మార్క్ కార్నీతో సమాచార భద్రత, మార్పిడిపై కీలక ఒప్పందం కుదిరింది. అమెరికా అధ్యక్షుడు డొనాల్డ్ ట్రంప్, బ్రిటన్ ప్రధాని, జర్మన్ ఛాన్సలర్, యూఏఈ, ఉక్రెయిన్ అధ్యక్షులతో ప్రధాని మోదీ ద్వైపాక్షిక చర్చలు జరిపారు. రక్షణ, వ్యూహాత్మక అంశాల్లో అనేక దేశాలతో సహకారం ముందుకు సాగింది. ఫ్రాన్స్ తో ఏరోనాటిక్స్, స్పేస్ రీసెర్చ్, నైపుణ్యాభివృద్ధి కేంద్రాల ఏర్పాటుకు నిర్ణయం జరిగింది. ఉత్తరప్రదేశ్ లోని కాన్పూర్ లో నేషనల్ స్కిల్ డెవలప్ మెంట్ సెంటర్ నెలకొల్పనున్నారు. భారత ఇన్నోవేట్ సదస్సులో 70 స్టార్టప్‌లు, 50 గ్లోబల్ ఇన్వెస్టర్లు పాల్గొని 14 ఎంఓయూలపై సంతకాలు చేశారు. మొత్తం 32 అంతర్జాతీయ కార్పోరేట్ ఎంఓయూలు కుదిరాయి. ఫ్రాన్స్ తీసుకున్న మరో కీలక నిర్ణయం ప్రకారం, సైన్స్, టెక్నాలజీ, ఇంజనీరింగ్, మ్యాథ్స్ (STEM) కోర్సుల్లో ప్రతి ఏటా 3000 మంది భారతీయ విద్యార్థులకు ప్రత్యేక సీట్లు కేటాయించనుంది.