యువతే దేశానికి అతిపెద్ద సంపద: ఆర్ఎస్ఎస్ చీఫ్ మోహన్ భగవత్

దేశానికి యువతే అతిపెద్ద సంపద అని ఆర్ఎస్ఎస్ చీఫ్ మోహన్ భగవత్ అన్నారు. యువతను సరిగ్గా నడిపిస్తే దేశానికి ఎంతో ప్రయోజనం ఉంటుందని, లేకపోతే భవిష్యత్తులో సమాజానికి భారంగా మారే ప్రమాదం ఉందని ఆయన హెచ్చరించారు.

యువతతో ఆయన రెండోసారి సంభాషించారు. 30 ఏళ్ల తర్వాత యువత వృద్ధులవుతారని గుర్తు చేశారు. తమ గురించే కాకుండా భావితరాలను దృష్టిలో ఉంచుకొని ఆలోచించాలని సూచించారు.

అమెరికా, చైనా, ఆస్ట్రేలియా, న్యూజిలాండ్ వంటి దేశాలతో పోలిస్తే భారతదేశం విభిన్నమైనదని భగవత్ పేర్కొన్నారు. ఆయా దేశాల విధానాలను గుడ్డిగా అనుసరించకుండా సొంత ప్రమాణాలను రూపొందించుకోవాలన్నారు.

ఉపాధి అంటే ఏసీ గదుల్లో చేసే ఉద్యోగాలు మాత్రమే కాదని, కాయకష్టం చేసే కార్మికుల శ్రమను గౌరవించాలన్నారు. అమెరికా, చైనా, కెనడా వంటి దేశాలకు వనరులు, భౌగోళిక విస్తీర్ణం ఎక్కువ, జనాభా తక్కువ అని చెప్పారు. భారతదేశానికి విస్తీర్ణం తక్కువ, జనాభా ఎక్కువ కాబట్టి పాశ్చాత్య దేశాల విధానాలను గుడ్డిగా అనుసరించలేమన్నారు.

సమస్యల పరిష్కారానికి ప్రత్యేకమైన భారతీయ విధానం అవసరమని అభిప్రాయపడ్డారు. ప్రపంచం ఎక్కువగా భౌతిక సుఖాలు, డబ్బు చుట్టూ తిరుగుతుందని, కానీ భారతీయ ఆలోచన కేవలం సంపాదనకే పరిమితం కాదన్నారు. దేశ పతాక ఔన్నత్యాన్ని గుర్తు చేస్తూ, అదే స్ఫూర్తితో దేశాన్ని ఉన్నత శిఖరాలకు చేర్చేందుకు కృషి చేయాలని యువతకు సూచించారు.