కొబ్బరి తోటల్లో వర్షాకాలం యాజమాన్యం: ఎరువులు, పురుగుల నివారణపై శాస్త్రవేత్తల సూచనలు

ఆంధ్రప్రదేశ్లో కొబ్బరి పంట సుమారు 2.60 లక్షల ఎకరాల్లో సాగవుతోంది. ఉభయ గోదావరి జిల్లాలతో పాటు కృష్ణా, గుంటూరు, చిత్తూరు, ఉత్తరాంధ్ర జిల్లాల్లో ఈ పంట విస్తారంగా ఉంది. ఎల్నీనో ప్రభావంతో ఈ ఏడాది వర్షాభావం ఏర్పడే అవకాశం ఉన్న నేపథ్యంలో రైతులు సరైన యాజమాన్య పద్ధతులు పాటించాలని వ్యవసాయ శాస్త్రవేత్తలు సూచిస్తున్నారు.

శ్రీకాకుళం జిల్లా ఆముదాలవలస వ్యవసాయ పరిశోధనా స్థానం సీనియర్ శాస్త్రవేత్త చిట్టిబాబు వివరాల ప్రకారం, పదేళ్లు దాటిన చెట్లకు జూన్-జూలై నెలలో ఒక కిలో యూరియా, ఒక కిలో DAP, 750 గ్రాముల నుంచి ఒక కిలో పొటాష్ ఎరువులు వేయాలి. మొక్క చుట్టూ మీటర్ దూరంలో పళ్లాలు చేసి ఎరువులు కలిపి నీరు అందించాలి. ఈ ఎరువులను అక్టోబర్-నవంబర్లో మళ్లీ వేయాలి. దీనివల్ల పూత, పిందె రాలిపోవడం తగ్గి దిగుబడి పెరుగుతుంది.

తట్టకాయలు రావడం, కాయ పగుళ్లు రావడం వంటి సమస్యలకు బోరాన్ లోపమే ప్రధాన కారణమని శాస్త్రవేత్తలు గుర్తించారు. ప్రతి మొక్కకు 20 గ్రాముల బోరాక్స్ పౌడర్‌ను NPK ఎరువులతో పాటు జూన్-జూలైలో, తర్వాత నవంబర్-డిసెంబర్‌లో వేసుకోవాలి. అలాగే పశువుల ఎరువు లేదా వేపపిండి వాడటం వల్ల నేల సారం పెరిగి, తేమ నిల్వ ఉండి కాయ రాలడం తగ్గుతుంది.

కొబ్బరి తోటల్లో నల్ల ముక్కు పురుగు (రైనోసైరస్ బీటిల్), ఎర్ర ముక్కు పురుగు (రెడ్ పామ్ వీవిల్) ఆశించడం వల్ల మొవ్వు దెబ్బతింటుంది. తోటను శుభ్రంగా ఉంచడం, పశువుల పేడ కుప్పలను తొలగించి దున్నడం ద్వారా పురుగుల ఉధృతి తగ్గుతుంది. ఎకరానికి 1-2 ఫెర్మోన్ బకెట్ ట్రాప్‌లు ఏర్పాటు చేసి, నల్ల ముక్కు పురుగుకు రైనో ల్యూర్, ఎర్ర ముక్కు పురుగుకు RPW ల్యూర్ ఉంచాలి.

వర్షాకాలంలో తెల్లదోమ ఉధృతి సహజంగా తగ్గుతుంది. అయితే ఎక్కువగా ఉంటే ఆకుల వెనుక భాగంలో ఐసేరియా జీవ శిలీంధ్రాన్ని లీటరు నీటికి 5 గ్రాములు కలిపి పిచికారి చేయాలి. లేదా లీటరు నీటికి 5 మి.లీ. వేపనూనె పిచికారి చేయడం, కాండం మీద పసుపు జిగురు అట్టలు అతికించడం ద్వారా తెల్లదోమను అదుపు చేయవచ్చు. రసాయన మందులు ప్రభావవంతంగా ఉండవు.

ఈ సమగ్ర యాజమాన్య పద్ధతులు పాటిస్తే కాయలు, పిందెలు రాలిపోకుండా మంచి దిగుబడి సాధించవచ్చునని శాస్త్రవేత్తలు తెలిపారు.