మాన్సూన్ ట్రఫ్ ఉత్తరం వైపు కదలడంతో తెలుగు రాష్ట్రాల్లో వర్షాభావం

దేశంలో నైరుతి రుతుపవనాల ప్రభావం ప్రస్తుతం ఉత్తర, మధ్య భారతంపై ఎక్కువగా కేంద్రీకృతమైందని వాతావరణ నిపుణులు తెలిపారు. దీంతో హిమాచల్ ప్రదేశ్, ఉత్తరాఖండ్, జమ్మూ కాశ్మీర్ తదితర రాష్ట్రాల్లో భారీ వర్షాలు కురుస్తుండగా, తెలంగాణ, ఆంధ్రప్రదేశ్ లలో మాత్రం వర్షాలు గణనీయంగా తగ్గాయి.

వాతావరణ శాఖ నిపుణుల వివరణ ప్రకారం, మాన్సూన్ ట్రఫ్ (రుతుపవన ద్రోణి) ప్రస్తుతం ఉత్తరాన కేంద్రీకృతమై ఉంది. దీనివల్ల అరేబియా సముద్రం, బంగాళాఖాతం నుంచి వచ్చే తేమతో కూడిన గాలులు ఉత్తరాది ప్రాంతాల్లో వర్షాలకు అనుకూలంగా మారాయి. తెలుగు రాష్ట్రాలపై బలమైన అల్పపీడనం లేదా ఉపరితల ఆవర్తనం లేకపోవడంతో వర్షాల తీవ్రత తగ్గిందని చెబుతున్నారు.

తెలంగాణలో జూన్ 1 నుంచి జూలై 22 వరకు సాధారణ వర్షపాతం 276.9 mm ఉండగా, ఇప్పటివరకు 211.6 mm మాత్రమే నమోదై 24% లోటు ఏర్పడింది. 21 జిల్లాలు లోటు వర్షపాతం కేటగిరీలో ఉండగా, ఒక జిల్లా తీవ్ర లోటు పరిధిలో ఉంది. ఆంధ్రప్రదేశ్ లోని కోస్తా, రాయలసీమ జిల్లాల్లోనూ అడపా దడపా వర్షాలు తప్ప నిలకడగా రుతుపవన వర్షాలు పడడం లేదు.

వర్షాభావంతో వ్యవసాయ రంగం తీవ్ర ఇబ్బందులు ఎదుర్కొంటోంది. భూగర్భ జలాలు పడిపోవడంతో బోరుబావులు ఎండిపోయాయి. ప్రాజెక్టుల్లో నీటి నిల్వలు తగ్గాయి. ఖరీఫ్ సాగుకు రైతులు సాగునీటి కొరతను ఎదుర్కొంటున్నారు. కేవలం ఎగువ రాష్ట్రాల వర్షాలకు గోదావరికి కొంత వరద నీరు వస్తున్నా, స్థానికంగా నీటి వనరులు బాగా తగ్గాయి.

బంగాళాఖాతంలో కొత్త అల్పపీడనం ఏర్పడితే లేదా మాన్సూన్ ట్రఫ్ దక్షిణం వైపు కదిలితే తెలుగు రాష్ట్రాల్లో మళ్లీ వర్షాలు పుంజుకునే అవకాశం ఉందని వాతావరణ అధికారులు సూచిస్తున్నారు.