తిరుమల అన్నప్రసాదంలో మళ్లీ ముద్దపప్పు? టీటీడీ కసరత్తు ప్రారంభం

తిరుమల శ్రీవారి అన్నప్రసాదంలో భక్తులకు మరోసారి ముద్దపప్పు అందించే అవకాశం కనిపిస్తోంది. టీటీడీ ఈ దిశగా కసరత్తు ప్రారంభించింది.

ఇటీవల భక్తుల అభిప్రాయ సేకరణలో 98 శాతం మంది అన్నప్రసాదంపై సంతృప్తి వ్యక్తం చేశారు. గతంలో లాగా ముద్దపప్పును తిరిగి ప్రవేశపెట్టాలని వారు కోరుతున్నట్లు టీటీడీ అధికారులు తెలిపారు.

2012లో అప్పటి టీటీడీ చైర్మన్ బాపిరాజు హయాంలో ముద్దపప్పు నెయ్యితో పాటు అందించేవారు. ఆ తర్వాత దాన్ని రద్దు చేశారు. ప్రస్తుతం అదనపు పీఈవో వెంకయ్య చౌదరి నేతృత్వంలో మరలా ముద్దపప్పు అందించే దిశగా ప్రయత్నాలు చేస్తున్నారు.

1985లో నిత్య అన్నదాన పథకంగా మొదలైన ఈ సేవ 2012లో శ్రీ వెంకటేశ్వర అన్నప్రసాదం ట్రస్ట్‌గా మారింది. ప్రస్తుతం నిత్యం సుమారు 1.8 లక్షల నుంచి 1.9 లక్షల మంది భక్తులకు అన్నప్రసాదం వితరణ చేస్తున్నారు. వారాంతాల్లో ఈ సంఖ్య 3 లక్షలకు చేరుతుంది. టీటీడీ ప్రధాన కేంద్రం తరిగొండ వెంగమాంబ అన్నప్రసాద కేంద్రంలో రోజూ 82 వేల మందికి పైగా భోజనాలు వడ్డిస్తుండగా, వైకుంఠం క్యూ కాంప్లెక్స్, నారాయణగిరి షెడ్లు, క్యూ లైన్లు, యాత్రికుల వసతి సముదాయాల్లో మరో లక్ష మందికి ఆహారం అందించబడుతుంది. ఈ అన్నప్రసాదాల కోసం రోజుకు 7 నుంచి 10 టన్నుల కూరగాయలను వినియోగిస్తున్నారు.

పెరుగుతున్న భక్తుల రద్దీ దృష్ట్యా టీటీడీ అన్నప్రసాద తయారీ సామర్థ్యాన్ని పెంచేందుకు సాటిలైట్ ఆటోమేటిక్ కిచెన్ నిర్మాణం కూడా చేపట్టింది. ముద్దపప్పు ప్రవేశపెట్టడంపై త్వరలోనే నిర్ణయం తీసుకుంటామని టీటీడీ అధికారులు పేర్కొన్నారు.